Եռակողմ հանդիպմանը Շառլ Միշելն ընդգծել է հայ գերիների ազատ արձակման կարևորությունը

Կողմերը համաձայնել են առարկայական աշխատանք սկսել՝ առաջխաղացում ապահովելու խաղաղության պայմանագրի շուրջ, որը կկարգավորի Հայաստանի և Ադրբեջանի միջպետական հարաբերությունները։ Այս մասին Բրյուսելում վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ եռակողմ հանդիպման արդյունքներով հայտարարել է Եվրոպական խորհրդի ղեկավար Շառլ Միշելը։

«Սա մեր չորրորդ հանդիպումն էր այս ձևաչափով։ Մեր քննարկումները կենտրոնացած էին Հարավային Կովկասի վերջին զարգացումների և ԵՄ-ի ու երկու երկրների հարաբերությունների վրա։ Կողմերի միջև կարծիքների փոխանակումն արդյունավետ էր, և ես կցանկանայի շնորհակալություն հայտնել երկու ղեկավարներին էլ դրա համար։ Մենք դիտարկել ենք մեր օրակարգային հարցերի ողջ շրջանակը»,- նշել է նա։

Շառլ Միշելն ընդգծել է, որ կողմերը պայմանավորվել են ուժեղացնել հիմնարար աշխատանքը՝ Ադրբեջանի և Հայաստանի միջև խաղաղության պայմանագրի հարցում առաջընթացի հասնելու համար։

«Այսօր մենք պայմանավորվեցինք ակտիվացնել աշխատանքը երկու երկրների միջև միջպետական ​​հարաբերությունները կարգավորող խաղաղության պայմանագրի առաջմղման ուղղությամբ և հանձնարարեցինք արտգործնախարարներին հանդիպել՝ մեկ ամսվա ընթացքում տեքստերի նախագծեր մշակելու համար»,- ասել է նա։

ԵՄ խորհրդի ղեկավարը նշել է, որ հանդիպման ընթացքում քննարկվել են հումանիտար հարցեր, ինչպես նաև ականազերծման, ձերբակալվածների և անհետ կորած քաղաքացիների ճակատագրի հարցեր։

Նախագահ Միշելը ադրբեջանական կողմին շեշտել է հայ գերիների ազատ արձակման կարևորությունը, նաև ընդգծել է, որ նիստում որոշվել է նաև ադրբեջանա-հայկական սահմանի սահմանազատման հանձնաժողովի հաջորդ նիստն անցկացնել Բրյուսելում։

Վերջում Շառլ Միշելը հայտարարել է, որ այս ձևաչափով հաջորդ եռակողմ հանդիպումը կկայանա մինչև այս տարվա նոյեմբերի վերջ։

Տաթև Ֆռանգյան