25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Բախումներ Իրաքում. ցուցարարները ներխուժել են նախագահի նստավայր
Քաղաքականություն
30.08.2022 | 11:33
Ազդեցիկ շիա իմամ Մուկթադա աս-Սադրը, որը միլիոնավոր հետևորդներ ունի ու իրաքյան քաղաքականության ամենահայտնի դեմքերից է, հայտարարել է քաղաքականությունից հեռանալու մասին: Դրանից հետո նրա հարյուրավոր կողմնակիցներ հավաքվել են Բաղդադի «Կանաչ գոտում», որտեղ տեղակայված են օտարերկրյա ներկայացուցչությունները ու ներխուժել են նախագահական պալատ, գրում է BBC-ի ռուսական ծառայությունը։
Անվտանգության ուժերը կիրառել են հրազեն և արցունքաբեր գազ, կանոնավոր զորքերը մտել են քաղաք և պարետային ժամ է հայտարարվել։
Բախումների հետևանքով զոհվել է առնվազն 20 մարդ, վիրավորվել՝ ավելի քան 200-ը։
Սադրի կողմնակիցները պահանջում են կառավարության հրաժարականը։ Երկու օր առաջ իմամը կոչ էր արել բոլորին, ովքեր ներգրավված են Իրաքի քաղաքականության մեջ 2013 թվականից ի վեր, լքել իրենց պաշտոնները (ներառյալ Սադրի սեփական դաշինքը):
Իրաքի ազգային INA լրատվական գործակալության փոխանցմամբ՝ Մուկթադա աս-Սադրը անկարգությունների սկսվելուց հետո հացադուլ է հայտարարել՝ նշելով, որ այն կընդհատի միայն բռնությունները դադարելուց հետո։
Իրաքի վարչապետ Մուստաֆա ալ-Քազիմին արտակարգ հանդիպում է անցկացրել Միացյալ օպերատիվ ռազմական հրամանատարության ներկայացուցիչների հետ և հրամայել հետաքննել ցուցարարների սպանությունները, քանի որ, ըստ նրա, «զինվորներին արգելված է եղել կրակել ցուցարարների վրա»։
ՄԱԿ-ի Իրաքի աջակցության առաքելությունը (UNAMI) իրավիճակն անվանել է չափազանց վտանգավոր էսկալացիա և կոչ է արել բոլոր կողմերին խուսափել քայլերից, որոնք կարող են հանգեցնել իրադարձությունների անվերահսկելի ընթացքի:
