Քաղաքականություն
29.08.2022 | 16:34
Թայվանի զինված ուժերն այսօր՝ օգոստոսի 29-ին արձանագրել են Չինաստանի Ժողովրդական-ազատագրական բանակի 37 ինքնաթիռների և ութ նավերի մոտենալը կղզուն, ասվում է Թայվանի պաշտպանության գերատեսչության ամենօրյա զեկույցում, գրում է ՌԻԱ Նովոստին։
«Օգոստոսի 29-ի ժամը 17:00-ի դրությամբ Թայվանի զինված ուժերը Թայվանի մերձակա ջրերում և օդային տարածքում գրանցել են Չինաստանի Ժողովրդա-ազատագրական բանակի 37 ինքնաթիռների և 8 նավերի ակտիվություն»,- ասվում է հաղորդագրության մեջ:
Նշվում է, որ Թայվանի նեղուցի այսպես կոչված «միջին գիծը» հատել է 12 ինքնաթիռ, այդ թվում՝ 8 ՍՈՒ-30 կործանիչ, երկուական՝ J-11 և J-16։
Գերատեսչության տվյալներով՝ Թայվանը օդային հսկողություն է սահմանել, ռադիոնախազգուշացում է արձակել, ինչպես նաև զենիթահրթիռային համակարգերը բերել է պատրաստոության։
Հիշեցնենք՝ Թայվանի շուրջ իրավիճակը սրվել է ԱՄՆ Ներկայացուցիչների պալատի խոսնակ Նենսի Փելոսիի վերջերս կղզի կատարած այցից հետո։ Չինաստանը, որը կղզին համարում է իր նահանգներից մեկը, լայնածավալ զորավարժություններ սկսել և դատապարտել Փելոսիի այցը՝ այդ քայլում տեսնելով «ԱՄՆ-ի աջակցությունը թայվանական անջատողականությանը»։
Տաթև Ֆռանգյան
