16.09.2026 | 12:19
ԱՄՆ Ներկայացուցիչների պալատը երրորդ անգամ Իրանի պատերազմը դադարեցնելու օգտին է քվեարկել
«Ռոսատոմ»-ին թույլատրվել է Հունգարիայում ատոմակայանի բլոկներ կառուցել
Քաղաքականություն
26.08.2022 | 15:58
Ռուսաստանի ատոմային էներգիայի «Ռոսատոմ» պետական կորպորացիան Հունգարիայում «Պակշ» ատոմակայանի 5-րդ և 6-րդ էներգաբլոկների կառուցման թույլտվություն է ստացել, գրում է DW-ի ռուսական ծառայությունը։
Հունգարիայի ատոմային էներգիայի ազգային վարչությունը հայտարարել է աշխատանքներ իրականացնելու լիցենզիա տրամադրելու վերաբերյալ վարչական ընթացակարգի ավարտի մասին։ Թույլտվությունը տրվել է 10 տարի ժամկետով։ Բլոկների շինարարությունը կարող է սկսվել 2022 թվականի հոկտեմբերին։
«Պակշ» ատոմակայանը կառուցվել է խորհրդային տեխնոլոգիայով 1980-ականներին։ Այն Հունգարիայի միակ ատոմակայանն է, ապահովել է երկրում արտադրվող էներգիայի ավելի քան 40 տոկոսը։
Հուլիսին Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն Ստամբուլում «Ռոսատոմի» ղեկավար Ալեքսեյ Լիխաչովի հետ հանդիպումից հետո հաստատել էր, որ Մոսկվան կֆինանսավորի նախագիծը, որը գնահատվում է 12,5 միլիարդ եվրո, և որն ի սկզբանե նախատեսվում էր 80%-ով իրականացնել ռուսական վարկի հաշվին։
Տաթև Ֆռանգյան
