19.08.2026 | 09:54
Ավտոդպրոցում կրթություն ստանալը պարտադիր է լինելու․ ՆԳ նախարար
Ուկրաինայում պատերազմի մեկնարկից ի վեր շուրջ 1 մլն ռուսաստանցի է մուտք գործել ԵՄ
Քաղաքականություն
26.08.2022 | 12:03
Եվրոպական սահմանային և առափնյա պահպանության Frontex գործակալության տվյալներով Ուկրաինայի դեմ Ռուսաստանի լայնամասշտաբ պատերազմի մեկնարկից ի վեր շուրջ 1 միլիոն ռուսաստանցի է մուտք գործել ԵՄ, գրում է DW-ի ռուսական ծառայությունը։
Փետրվարի 24-ից օգոստոսի 22-ն ընկած ժամանակահատվածում 998 085 ՌԴ քաղաքացի հատել է ԵՄ սահմանները, հայտնել է Frontex-ի ներկայացուցիչը։ Օգոստոսի 16-ից 22-ն ընկած ժամանակահատվածում Եվրամիություն մուտք գործող ռուսաստանցիների թիվը նախորդ շաբաթվա համեմատ փոքր-ինչ նվազել է։
Ուկրաինայում շարունակվող պատերազմի ֆոնին ավելի ու ավելի շատ եվրոպական երկրներ միակողմանիորեն սահմանափակում են Ռուսաստանի քաղաքացիների համար Շենգենյան վիզաների տրամադրումը։ Նման միջոցներ արդեն ձեռնարկել են Էստոնիան, Լատվիան, Լիտվան և Չեխիան։ Ֆինլանդիան ծրագրում է նրանց օրինակին հետեւել սեպտեմբերին, Լեհաստանը ևս դիտարկում է նման հնարավորությունը։ Դանիան առաջարկում է ռուսաստանցիների համար վիզաների վերաբերյալ համաեվրոպական որոշում ընդունել։ Չնայած դրան՝ ԵՄ որոշ երկրներ չեն աջակցում Ռուսաստանի Դաշնության քաղաքացիներին տուրիստական վիզաների տրամադրման արգելքի գաղափարին։ Օրինակ՝ Գերմանիայի կանցլեր Օլաֆ Շոլցն ասել էր, որ պատերազմին դեմ ռուսաստանցիները պետք է հնարավորություն ունենան լքել իրենց երկիրը։ Բացի այդ, նմանատիպ դիրքորոշում է հայտնել Եվրամիության արտաքին հարաբերությունների գծով բարձր ներկայացուցիչ Ժոզեպ Բորելը:
Տաթև Ֆռանգյան
