Քաղաքականություն
24.08.2022 | 13:17
Եվրահանձնաժողովի համատեղ հետազոտական կենտրոնը հրապարակել է զեկույց, որի հեղինակները նշում են՝ եվրոպական մայրցամաքի երկու երրորդը բախվել է վերջին հինգ դարերի ամենաերկարատև երաշտի հետ, և ամեն ինչ կարող է ավելի վատանալ, գրում է BBC-ի ռուսական ծառայությունը:
Իրավիճակը բարդ է Եվրոպայի բազմաթիվ երկրներում՝ Իտալիայում, Իսպանիայում, Պորտուգալիայում, Ֆրանսիայում, Գերմանիայում, Նիդերլանդներում, Բելգիայում, Լյուքսեմբուրգում, Ռումինիայում, Հունգարիայում, Սերբիայում, Ուկրաինայում, Մոլդովայում, Իռլանդիայում և Մեծ Բրիտանիայում։ Այս երկրները միասին զբաղեցնում են մայրցամաքի ընդհանուր 47 %-ը։ Այս տարածաշրջանում հողն ամբողջությամբ չորացել է, գրում են զեկույցի հեղինակները։
Մայրցամաքի ևս 17 % տարածք լիակատար չորացման եզրին է, և այնտեղ բուսականությունը փրկելու հավանականությունը փոքր է:
Եվրահանձնաժողովի գիտության հարցերով հանձնակատար Մարիա Գաբրիելի խոսքով՝ մայրցամաքի շոգը աննախադեպ լարվածություն է ստեղծել ամբողջ Եվրամիությունում ջրի մատակարարման առումով:
«Մենք տեսնում ենք, որ անտառային հրդեհների օջախների թիվը միջինից շատ ավելին է և լուրջ ազդեցություն է թողնում բերքի վրա: Անկասկած, կլիմայի գլոբալ փոփոխությունը տարեցտարի ավելի նկատելի է դառնում»,- ասել է նա։ Ըստ զեկույցի՝ գետերում սակավաջրության հետևանքով հիդրոէներգիայի արտադրությունը նվազել է 20%-ով, խնդիրներ են առաջացել նաև նավերի տեղաշարժի համար։ Եվրոպական միջերկրածովյան երկրներում աննախադեպ շոգն ու երաշտը կարող են տևել մինչև նոյեմբեր, զգուշացնում են բնապահպանները։
