ՄԱԳԱՏԷ-ի ղեկավարը ցանկանում է անձամբ այցելել Զապորոժիեի ԱԷԿ

Ատոմային էներգիայի միջազգային գործակալության ղեկավար Ռաֆայել Գրոսսին BBC-ին ասել է, որ ծրագրում է անձամբ գլխավորել առաքելությունը Ռուսաստանի կողմից օկուպացված Զապորոժիեի ատոմակայան, և նման այցը պետք է տեղի ունենա «ոչ թե շաբաթների, այլ օրերի ընթացքում», գրում է BBC-ի ռուսական ծառայությունը:

Գրոսսին չի հստակեցրել, թե ինչպես են ՄԱԳԱՏԷ-ի տեսուչները մտադիր հասնել կայան՝ Ուկրաինայի կողմից վերահսկվող տարածքո՞վ, թե՞ ռուսական բանակի կողմից գրավված տարածքներով: Նա ընդգծել է, որ այս հարցը պետք է «մի կողմ դնել», քանի որ ստեղծված իրավիճակն անհապաղ լուծում է պահանջում։

ՄԱԳԱՏԷ-ի ղեկավարը հայտնել է, որ կազմակերպությունը մտադիր է գնահատել կայանի ընդհանուր վիճակը, անվտանգության համակարգերի ամբողջականությունն ու սպասարկելիությունը, ինչպես նաև էլեկտրամատակարարումը։ Տեսուչները ցանկանում են նաև խոսել ինչպես ուկրաինական գործարանի անձնակազմի, այնպես էլ այնտեղ ներկա ռուսների հետ և մշտական ներկայություն հաստատել գործարանում:

Անցյալ շաբաթ Վլադիմիր Պուտինը Ֆրանսիայի նախագահ Էմանուել Մակրոնի հետ քննարկել է Զապորոժիեի ԱԷԿ-ում ստեղծված իրավիճակը։ Կրեմլի մամուլի ծառայության հաղորդմամբ՝ կողմերը «նշել են ՄԱԳԱՏԷ-ի առաքելություն որքան հնարավոր է շուտ ատոմակայան ուղարկելու կարևորությունը, որը կկարողանա տեղում գնահատել իրական իրավիճակը»։
Ռուսական զորքերը մարտ ամսից գրավել են Եվրոպայի ամենամեծ ատոմակայանը։ Այն պարբերաբար ենթարկվում է հրետակոծությունների, որոնցում Ռուսաստանն ու Ուկրաինան մեղադրում են միմյանց։

Տաթև Ֆռանգյան