09.10.2026 | 13:56
ԱԱԾ-ն հերքում է ադրբեջանցիների ներթափանցումը Սյունիք
ՌԴ-ն սպասում է հայկական կողմի պատասխանին՝ կապված ՀՀ ԱԳՆ-ին ուղղված բողոքի նոտայի հետ
Քաղաքականություն
18.08.2022 | 19:01
Ռուսաստանը սպասում է հայկական կողմի պատասխանին՝ կապված ՀՀ ԱԳ նախարարությանն ուղարկված բողոքի նոտայի հետ։ Այսօր կայացած ճեպազրույցում այս մասին հայտարարել է ՌԴ ԱԳՆ տեղեկատվության և մամուլի դեպարտամենտի փոխտնօրեն Իվան Նեչաևը։
«Մենք պատրաստ ենք հաստատել ՀՀ ԱԳՆ-ին համապատասխան նոտա ուղարկելը, համապատասխան հայտարարություն է արել Երևանում ՌԴ դեսպանատունը, և այսօր ՌԴ գործերի ժամանակավոր հավատարմատարը կառուցողական զրույց է ունեցել Հայաստանի ԱԳՆ-ի ղեկավարության հետ։ Մենք պատասխանի ենք սպասում»,- ասել է Նեչաևը։
Նշենք, որ նախօրեին Երևանում ՌԴ դեսպանատունը նոտա էր հղել ՀՀ ԱԳՆ-ին՝ կապված տեղական որոշ լրատվամիջոցներում հրապարակումների հետ, որոնցում օգոստոսի 14-ին Երևանի «Սուրմալու» առևտրի կենտրոնում տեղի ունեցած պայթյունի մեջ Մոսկվայի հասցեին մեղադրանքներ են հնչում։
Հավելենք, որ Factor.am-ը փորձեց ԱԳՆ-ից ճշտել՝ արդյո՞ք պաշտոնական Երևանն արձագանքե՞լ է ռուսական կողմի բողոքի նոտային, և եթե այո՝ ի՞նչ արձագանք է եղել։ Ի պատասխան՝ ԱԳՆ խոսնակ Վահան Հունանյանը նշեց հետևյալը․ «Հիշյալ նոտան ստացել ենք և սահմանված կարգով կարձագանքենք»։
Տաթև Ֆռանգյան
