Քաղաքականություն
18.08.2022 | 22:32
Ադրբեջանը, Վրաստանը և Թուրքիան Բաքու-Թբիլիսի-Կարս երկաթուղու նախագծի շրջանակում տարանցման մաքսային ընթացակարգերը պարզեցնելու համար առաջնային տվյալների էլեկտրոնային փոխանակման վերաբերյալ համաձայնագիր են ստորագրել։
Օգոստոսի 18-ին տեղի է ունեցել մաքսային հարցերով եռակողմ հանձնաժողովի նիստը Ադրբեջանի, Թուրքիայի և Վրաստանի կառավարությունների ներկայացուցիչների միջև։ Այդ նպատակով Ադրբեջան են ժամանել Թուրքիայի մաքսային վարչության պետ, առևտրի փոխնախարար Ռզա Թունա Թուրագայի և Վրաստանի եկամուտների ծառայության գլխավոր տնօրեն Լևան Կակավայի գլխավորած պատվիրակությունները, հայտնում են ադրբեջանական լրատվամիջոցները։
Պատվիրակությունների երկկողմ ձևաչափով հանդիպումներում քննարկվել են մաքսային ոլորտում համագործակցությունը, փոխադարձ հետաքրքրություն ներկայացնող հարցեր։
Այնուհետև աշխատանքն է սկսել մաքսային հարցերով եռակողմ հանձնաժողովի նիստը։ Հանդիպմանը ելույթ ունեցած պատվիրակությունների ղեկավարները կարևորել են մաքսային ոլորտում համագործակցությունը տարածաշրջանային և միջազգային առևտրի դյուրին և արագ իրականացման համար ու նշել, որ համաձայնագիրը կարևոր ներդրում կունենա այդ ուղղությամբ առավել արդյունավետ գործունեության հարցում։
Տաթև Ֆռանգյան
