14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԱՄՆ-ը կարող է դուրս բերել իր ընկերությունները Թուրքիայից՝ ՌԴ-ի հետ մերձեցման պատճառով
Քաղաքականություն
18.08.2022 | 14:50
Սպիտակ տունը կարող է ամերիկյան ընկերություններին առաջարկել կրճատել Թուրքիայի հետ բիզնեսը, եթե Անկարան և Մոսկվան կնքեն «պաշտոնական տնտեսական գործընկերություն»։ Այս մասին գրում է Politico պարբերականը՝ հղում անելով ԱՄՆ վարչակազմի աղբյուրին։
«Մենք կարծում ենք, որ Թուրքիան պետք է լինի բիզնեսի և կապիտալի ներգրավման համաշխարհային կենտրոն, սակայն Ռուսաստանի հետ սերտ հարաբերություններն իրական ռիսկեր կստեղծեն մնացած աշխարհի հետ Թուրքիայի ինտեգրման համար»,- ասել է աղբյուրը։
Նրա խոսքով՝ Թուրքիայի և Ռուսաստանի հետագա մերձեցման դեպքում Անկարային կարող են արգելել դոլարով վճարումներ կատարել։
Օգոստոսի 6-ին Սոչիում կայացել է Թուրքիայի և Ռուսաստանի նախագահներ Ռեջեփ Թայիփ Էրդողանի ու Վլադիմիր Պուտինի բանակցությունները։ Էրդողանի խոսքով՝ որոշվել է անցնել ազգային արժույթներով առևտրին և երկրների միջև տարեկան ապրանքաշրջանառությունը հասցնել 100 միլիարդ դոլարի։ ՌԴ փոխվարչապետ Ալեքսանդր Նովակը հայտնել է, որ թուրքական կողմը նույնպես համաձայնել է մասնակի վճարել ռուսական գազի դիմաց ռուբլով։
Ավելի վաղ ԱՄՆ-ը պատժամիջոցներ էր սահմանել Թուրքիայի դեմ՝ սպառազինության ոլորտում Ռուսաստանի հետ համագործակցության համար։ Թուրքիան գնում է ռուսական արտադրության С-400 զենիթահրթիռային համակարգեր, ինչի կապակցությամբ ԱՄՆ-ը Թուրքիային դուրս է թողել F-35 կործանիչների արտադրության ծրագրից։
Տաթև Ֆռանգյան
