16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
«Ամենաողբերգական գիշերներից մեկը Խարկովի մարզի համար». ռուսական զորքերը հրթիռակոծել են Խարկովը
Քաղաքականություն
18.08.2022 | 14:10
Անցած գիշեր Խարկովի մարզը ենթարկվել է ռուսական զորքերի զանգվածային հարձակումներին, խաղաղ բնակչության շրջանում կան զոհեր և վիրավորներ: Այս մասին հայտնել է վարչակազմի ղեկավար Օլեգ Սինեգուբովը, գրում է BBC-ի ռուսական ծառայությունը։
«Անցած գիշերը Խարկովի շրջանի համար ամենաողբերգականներից մեկն էր ողջ պատերազմի ընթացքում: Գիշերվա ընթացքում ռուսները զանգվածային հրթիռային հարձակումներ են իրականացրել Խարկովի վրա»,- գրել է Սինեգուբովը Telegram-ի իր ալիքում:
Ըստ նրա՝ օգոստոսի 17-ին ժամը 21:30-ի սահմաններում ռուսական հրթիռը (ենթադրաբար՝ Իսկանդեր) խոցել է Սալտովսկի թաղամասի եռահարկ բնակելի շենքը։ Տունը գրեթե ամբողջությամբ ավերվել է, հրդեհ է բռնկվել։ Վերջին տվյալներով՝ փլատակների տակ մահացել է 7 մարդ, վիրավորվել՝ 17-ը, այդ թվում՝ 11-ամյա երեխա։
Օգոստոսի 18-ի առավոտյան ժամը 4:30-ի սահմաններում Բելգորոդից Խարկովի շրջանի ուղղությամբ արձակվել է ևս 8 հրթիռ։
Սլոբոդսկի թաղամասում հրթիռներից մեկը դիպել է չորս հարկանի հանրակացարանի շենքին, այն մասամբ ավերվել է։ Այս պահի դրությամբ՝ 2 մարդ մահացել է, 18-ը (այդ թվում՝ 2 երեխա)՝ վիրավորվել։
«Բացի այդ, այսօր առավոտյան ժամը մոտ 4-ին հրթիռային հարձակում է իրականացվել Կրասնոգրադի վրա։ Արդյունքում ավերվել են բնակելի շենքեր, վնասվել է ավելի քան 10 տուն։ Զոհվել է 2 խաղաղ բնակիչ, 2-ը (այդ թվում՝ 12-ամյա երեխա) վիրավորվել է»,- ասել է Սինեգուբովը։
Տաթև Ֆռանգյան
