Մոսկվայում մեկնարկել է «Ազատություն» ռադիոկայանի սնանկության գործընթացը

«Ազատ Եվրոպա/Ազատություն» մեդիաընկերության ռուսական ստորաբաժանման նկատմամբ սնանկության վարույթ է հարուցվել։ Օգոստոսի 15-ին Մոսկվայի արբիտրաժային դատարանը «Ազատություն» ռադիոկայանի ռուսական իրավաբանական անձի սնանկության գործընթացի նախնական փուլն է սկսել, գրում է DW-ի ռուսական ծառայությունը։

Մարտի սկզբին Դաշնային հարկային ծառայությունը (ФНС) պահանջեց սնանկ ճանաչել «Ազատ Եվրոպա/Ազատություն ռադիոկա» ՍՊԸ-ին: Առաջարկվում էր դա անել պարզեցված ընթացակարգով՝ առանց մոնիթորինգի փուլի, սակայն օգոստոսին Դաշնային հարկային ծառայությունը խնդրեց սնանկությունն իրականացնել սովորական ձևով՝ բացատրելով, որ «Ազատություն ռադիոկայանի» ռուսական իրավաբանական անձը «գույք ունի, որը կարող է օգտագործվել սնանկության վարույթը վճարելու համար»։

Ընկերության հարկային պարտքը կազմում է շուրջ 7 միլիոն ռուբլի, դատարանում հայտնել է Դաշնային հարկային ծառայության ներկայացուցիչը։

2021 թվականից ի վեր «Ազատություն» ռադիոկայանը տուգանվել է ավելի քան մեկ միլիարդ ռուբլով։ Տուգանքների մեծ մասը՝ 988,5 միլիոնը, դատարանների կողմից սահմանվել է լրատվամիջոցին որպես «օտարերկրյա գործակալ» պիտակավորման բացակայության պատճառով (Վարչական իրավախախտումների վերաբերյալ օրենսգրքի 19.34.1 հոդված)։ Եվս 75,8 միլիոն ռուբլու տուգանք է գանձվել Ուկրաինայի պատերազմի մասին նյութերը հեռացնելու մերժման համար (Վարչական իրավախախտումների վերաբերյալ օրենսգրքի 13.41-րդ հոդված):

Դաշնային հարկային ծառայության սնանկության դիմումից երկու օր անց «Ազատություն» ռադիոկայանի կայքն արգելափակվել է ուկրաինական պատերազմը լուսաբանելու համար, մեդիա ընկերությունը դադարեցրել է աշխատանքը Ռուսաստանում։

Տաթև Ֆռանգյան