15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Ղրիմի ավիաբազայի պայթյունները զգալիորեն նվազեցրել են Ռուսաստանի Սևծովյան նավատորմի հնարավորությունները. Բրիտանիայի հետախուզություն
Քաղաքականություն
12.08.2022 | 14:42
Մեծ Բրիտանիայի հետախուզությունն իր ամենաօրյա զեկույցում վերլուծել է Ղրիմում ռուսական «Սակի» ավիաբազայի պայթյունների հանգամանքները։ Ըստ մասնագետների՝ դրանք կարող են ազդել ռազմական գործողությունների հետագա ընթացի վրա, գրում է BBC-ի ռուսական ծառայությունը։
Մասնավորապես, զեկույցում ասվում է, որ օգոստոսի 9-ին պայթյուններ են տեղի ունեցել Ղրիմի արևմտյան «Սակի» ռուսական ռազմական օդանավակայանում։ Պայթյունների սկզբնական պատճառը պարզ չէ, սակայն ականատեսների կողմից արված տեսագրություններում երևացող սնկային ամպերը, հավանաբար, առաջացել են առնվազն չորս զինամթերքի բաց պահեստների պայթյունի արդյունքում։
«Որոշակի վստահությամբ կարելի է պնդել, որ պայթյունների հետևանքով ոչնչացվել կամ լրջորեն վնասվել են առնվազն հինգ Սու-24Մ ռմբակոծիչներ և երեք Սու-30ՍՄ բազմաֆունկցիոնալ կործանիչներ։ «Սակի» ավիաբազայի կենտրոնական ցրման տարածքը լուրջ վնասներ է ստացել, սակայն օդանավակայանը, ամենայն հավանականությամբ, շարունակում է գործել»,-ասվում է զեկույցում։
Նշվում է, որ ութ մարտական ինքնաթիռների կորուստն աննշան է ռազմական ինքնաթիռների ընդհանուր թվի համեմատ, որը Ռուսաստանն ունի այս պատերազմում։ Սակայն «Սակի»-ն հիմնականում օգտագործվել է որպես Ռուսաստանի ռազմածովային ուժերի Սևծովյան նավատորմի ավիացիայի բազա, որի հնարավորությունները ներկայում զգալիորեն կրճատված են։
«Միջադեպը, հավանաբար, կստիպի ռուս հրամանատարությանը նորովի նայել ռիսկերին ու վտանգներին, որոնց բախվում է թերակղզին։ Մինչև վերջերս Ղրիմը, ամենայն հավանականությամբ, դիտարկվում էր որպես անվտանգ թիկունք»,- ասվում է Բրիտանիայի ՊՆ ամփոփագրում։
Էմմա Չոբանյան
