Իրանը ռուս զինվորականներին ուսուցանել է իր անօդաչու թռչող սարքերի շահագործումը․ Պետքարտուղարություն

Ռուս զինվորականները վերապատրաստում են անցել Իրանում՝ իրանական անօդաչու թռչող սարքերը Մոսկվա տեղափոխելու համաձայնագրի շրջանակում։ Այս մասին գրում է Reuters գործակալությունը՝ վկայակոչելով Պետքարտուղարության տվյալները։

Մասնավորապես, Պետքարտուղարության փոխխոսնակ Վեդանտ Պատելը հայտնել է, որ ռուս զինվորականները վերջին մի քանի շաբաթների ընթացքում անօդաչու թռչող սարքերով վարժանքներ են անցկացրել Իրանում: Նրա խոսքով՝ Իրանի կողմից անօդաչու թռչող սարքերի փոխանցումը Ռուսաստանին «պոտենցիալ կերպով ընկնում է բազմաթիվ պատժամիջոցների տակ»։

«Մենք շարունակում ենք խորապես անհանգստացած լինել Իրանի կողմից անօդաչու թռչող սարքերի կիրառման և տարածման հետ կապված: Դրանք օգտագործվել են ԱՄՆ զորքերի, տարածաշրջանում մեր գործընկերների և միջազգային կազմակերպությունների վրա հարձակվելու համար»,- ասել է նա:

Ավելի վաղ ԶԼՄ-ները հայտնել էին, որ ՌԴ նախագահ Վլադիմիր Պուտինը Թուրքիայի առաջնորդ Ռեջեփ Թայիփ Էրդողանին խնդրել է Ռուսաստանում «Բայրաքթար» անօդաչու թռչող սարքերի արտադրության գործարան բացել։ Այս տեղեկությունը պաշտոնապես չի հաստատվել։

Հիշեցնենք, որ ավելի վաղ Պատերազմի ուսումնասիրման ամերիկյան ինստիտուտի (ISW) վերլուծաբանները հանգել էին եզրակացության, որ Իրանը կարող է անօդաչու թռչող սարքերի առաջին խմբաքանակն ուղարկել Ռուսաստան՝ ակնկալելով ռուսական Սու-35 ռազմական ինքնաթիռներ ստանալ։

Մինչ այս հաղորդվում էր, որ Իրանը Ռուսաստանի Դաշնության հետ պայմանագիր է ստորագրել արտադրամասերի և ինքնաթիռների սարքավորումների արտահանման վերաբերյալ։

Տաթև Ֆռանգյան