02.07.2026 | 12:36
ՌԴ-ն Ուկրաինայի դեմ 74 հրթիռ և շուրջ 500 ԱԹՍ է կիրառել․ Կիևում զոհերի թիվը հասել է 13-ի
Թուրքիան ու Իսրայելը 13 տարվա դադարից հետո առաջին տնտեսական համաժողովն են անցկացնելու
Քաղաքականություն
10.08.2022 | 14:10
Թուրքիան և Իսրայելը ծրագրում են համաժողով անցկացնել տնտեսության և առևտրային հարաբերություններին նվիրված, որով ձգտում են վերականգնել իրենց կապերը։ Այս մասին հաղորդում է Asharq Al-Awsat-ը՝ վկայակոչելով Թել Ավիվից անանուն քաղաքական աղբյուրի, փոխանցում է «Ահվալ» գործակալությունը։
Նշվում է, որ միջոցառումը տեղի է ունենալու աշնանը։ Իսրայելի էկոնոմիկայի նախարար Օրնա Բարբիվայը դեսպան Մաթան Սաֆրանին նշանակել է Թուրքիայում նոր տնտեսական կցորդ։ Ավելի վաղ Իսրայելը հայտարարել էր Ստամբուլում իր առևտրային ու տնտեսական գրասենյակի վերաբացման մասին։
Այս տնտեսական համաժողովը երկու երկրների միջև հինգերորդն է լինելու։ Վերջինը տեղի է ունեցել 2009 թվականին։
Իսրայելի և Թուրքիայի միջև տնտեսական հարաբերությունների վրա էապես չի ազդել երկկողմ հարաբերությունների անկումը, որի հետևանքով 2018-ին հետ կանչվեցին երկու երկրների դեսպանները: Սակայն այժմ բավական ակտիվ քայլեր են արվում դրանք վերականգնելու ուղղությամբ։ Իսրայելի նախագահ Իսահակ Հերցոգը մարտին այցելել էր Թուրքիա՝ սկիզբ դնելով հարաբերությունների բարելավմանը։ Թուրքիայի արտգործնախարար Մևլութ Չավուշօղլուն մայիսին այցելել էր Իսրայել, իսկ հուլիսին Հերցոգը զանգահարել էր Թուրքիայի նախագահ Ռեջեփ Թայիփ Էրդողանին։
Էմմա Չոբանյան
