Ռուսաստանը վերջնականապես կորցրել է ածխի եվրոպական շուկան

Ընդամենը չորս տարի առաջ ռուսական ածխի արտահանման մոտ կեսն ուղղվել է դեպի արևմուտք՝ Եվրոպա: Դեռևս ընթացիկ տարվա սկզբին Եվրամիության ամենամեծ տնտեսությունը՝ Գերմանիան, կարծր ածխի ավելի քան 50%-ը ներկրում էր Ռուսաստանից։ Հիմա այդ օրերն ընդմիշտ անցել են, գրում է DW-ի ռուսական ծառայությունը։

Օգոստոսի 10-ին, քառամսյա անցումային շրջանից հետո, ուժի մեջ է մտել Ռուսաստանի Դաշնությունից ածխի ներկրման ԵՄ էմբարգոն, որը սահմանվել էր ապրիլի սկզբին Ուկրաինայի դեմ ռուսական ագրեսիայի պատճառով պատժամիջոցների հինգերորդ փաթեթի շրջանակում։ Եվ եթե անգամ այս պատժամիջոցները չեղարկվեն, դեռ վերադարձ անցյալին չի լինի. ընթացիկ տասնամյակի ընթացքում եվրոպական երկրների մեծ մասը մտադիր է ամբողջությամբ հրաժարվել էլեկտրաէներգիայի գլոբալ կլիմայի համար ամենավտանգավոր հանածո վառելիքի օգտագործումից։ Այսպիսով, ռուսաստանյան ածխահանքերը վերջնականապես կորցրել են վաճառքի եվրոպական շուկան։

Նման կորուստը Վլադիմիր Պուտինին չի ստիպի դադարեցնել պատերազմն Ուկրաինայում. Եվրամիությունն այս հարցում պատրանքներ չունի։ Այստեղ հասկանում են, որ ածխի էմբարգոն ընդամենը մեկն է Արևմուտքի բազմաթիվ պատժամիջոցներից, որոնք նախատեսված են Ռուսաստանի համար ագրեսիայի գինն առավելագույնի հասցնելու նպատակով:

Այնուամենայնիվ, ռուսական տնտեսության մի քանի կարևոր հատվածների և Ռուսաստանի Դաշնության որոշ շրջանների համար եվրոպացիների հրաժարումը ռուսական ածխից, անշուշտ, շոշափելի կորուստների կհանգեցնի։

Ամենաշատը կտուժեն Կուզբասի և Ռուսաստանի Դաշնության այլ ածխային շրջանների հանքագործները։ Զգալի վնաս կկրի նաև ռուսական այնպիսի խոշոր գործատուն, ինչպիսին «Ռուսական երկաթուղիներ» ընկերությունն է, որի համար ածխի փոխադրումը եկամտի հիմնական աղբյուրներից է։

Տաթև Ֆռանգյան