17.01.2026 | 12:14
«Կայուն»-ից դեպի «դրական». Fitch Ratings-ը բարձրացրել է Հայաստանի վարկանիշի հեռանկարը
Ֆլորիդայում Թրամփի նստավայրը խուզարկել են․ այն մի քանի ժամ է տևել
Քաղաքականություն
09.08.2022 | 16:35
ԱՄՆ նախկին նախագահ Դոնալդ Թրամփը հայտարարել է, որ Հետաքննությունների դաշնային բյուրոյի (ՀԴԲ) աշխատակիցները խուզարկություն են իրականացրել Ֆլորիդայում իրեն պատկանող Մար-ա-Լագո նստավայրը, գրում է BBC-ի ռուսական ծառայությունը։
«Մեր ազգի համար մութ ժամանակներ են եկել, քանի որ իմ հիասքանչ տունը՝ Մար-Ա-Լագոն Ֆլորիդա նահանգի Պալմ Բիչում, այժմ գտնվում է շրջափակման մեջ, խուզարկության է ենթարկվել և օկուպացվել ՀԴԲ մեծաթիվ աշխատակիցների կողմից։ Սրանք դատախազության ոչ համաչափ գործողություններն են, արդարադատության համակարգն օգտագործելն ու արմատական ձախակողմյան դեմոկրատների վրա հարձակումները, որոնք հուսահատորեն չեն ցանկանում, որ ես առաջադրվեմ 2024 թվականի նախագահական ընտրություններում»,- ասվում է Թրամփի Truth Social սոցցանցում հրապարակված գրառման մեջ։
ԱՄՆ նախկին նախագահը չի նշել խուզարկության պատճառը։ Թրամփն ասել է, որ «նման բան երբեք չի պատահել ԱՄՆ նախագահի հետ» և նշել, որ ՀԴԲ գործակալները նույնիսկ բացել են իր չհրկիզվող պահարանը։
Ապրիլին հաղորդվել է, որ ԱՄՆ Արդարադատության նախարարությունը հետաքննություն է սկսել Թրամփի կողմից նախագահական պաշտոնական փաստաթղթերը Մար-ա-Լագոյի նստավայր տեղափոխելու վերաբերյալ, որտեղ նա մշտապես բնակվում է 2021 թվականի հունվարից։
Հետաքննությունը սկսվեց այն բանից հետո, երբ փետրվարին ԱՄՆ Ազգային արխիվների և փաստաթղթերի վարչությունը տեղեկացրեց Կոնգրեսին, որ կալվածքում հայտնաբերել է Սպիտակ տան փաստաթղթերի շուրջ 15 տուփ, որոնցից մի քանիսը գաղտնի նյութեր են պարունակում:
Ներկայացուցիչների պալատի վերահսկողական հանձնաժողովն այնուհետ հայտարարեց, որ ընդլայնում է Թրամփի գործողությունների հետաքննությունը և խնդրեց լրացուցիչ տեղեկություններ տրամադրել:
Թրամփն ավելի վաղ հաստատել էր, որ համաձայնել է որոշ փաստաթղթեր վերադարձնել արխիվ՝ այն անվանելով «սովորական գործընթաց»։
Տաթև Ֆռանգյան
