Քաղաքականություն
09.08.2022 | 15:40
Բնական գազի սպառման կրճատման՝ ԵՄ արտակարգ ծրագիրն օգոստոսի 9-ին ուժի մեջ է մտել։ Այն նախատեսում է, որ ԵՄ բոլոր երկրներն օգոստոսի սկզբից մինչև հաջորդ տարվա մարտը կամավոր կնվազեցնեն գազի սպառումը 15 տոկոսով՝ համեմատած այս ժամանակահատվածում վերջին հինգ տարիների միջին սպառման հետ, գրում է DW-ի ռուսական ծառայությունը։
Նման միջոցառման նպատակն է նվազեցնել այն ռիսկերը, որոնք կարող են առաջանալ Ռուսաստանից գազի մատակարարումների ամբողջական դադարեցման հետևանքով։ Ուկրաինայի դեմ Ռուսաստանի սանձազերծած պատերազմի ֆոնին «Գազպրոմն» արդեն կտրուկ կրճատել է այդ հումքի մատակարարումների ծավալը եվրոպական երկրներ։
Եվրահանձնաժողովի կարծիքով՝ ԵՄ երկրները պետք է, ընդհանուր առմամբ, խնայեն 45 միլիարդ խորանարդ մետր գազ։ Գերմանիան պետք է կրճատի իր գազի սպառումը մոտ 10 միլիարդ խորանարդ մետրով, որպեսզի հասնի 15 տոկոսի թիրախին:
Եթե մատակարարման լայնածավալ դեֆիցիտի պայմաններում հնարավոր չէ բավարար խնայողություններ անել, ապա հաջորդ քայլը կարող է լինել ամբողջ ԵՄ-ում տագնապ բարձրացնելը և գազի սպառումը նվազեցնելու պարտադիր թիրախներ սահմանելը: Այս քայլը պահանջում է ԵՄ առնվազն 15 երկրների համաձայնությունը, որոնք կազմում են միության ողջ բնակչության առնվազն 65 տոկոսը։
Միևնույն ժամանակ, ԵՄ որոշ երկրներ, ինչպիսիք են Իսպանիան և Իտալիան, իրենց համար բացառությունների են հասել գազի խնայողության ծրագրից և մտադիր են նվազեցնել սպառումը 15 տոկոսից պակաս չափով: Արտակարգ իրավիճակների ծրագիրը կգործի մեկ տարի։
Տաթև Ֆռանգյան
