Քաղաքականություն
09.08.2022 | 18:44
Ռուսաստանի նախագահ Վլադիմիր Պուտինն Անկարայի համար կրիտիկական պահին աջակցել է իր թուրք գործընկեր Ռեջեփ Թայիփ Էրդողանին, գրում է Bloomberg-ը։
Պուտինի աջակցությունը մեծ օգնություն կլինի Էրդողանի համար, քանի որ Թուրքիայի համընդհանուր ընտրություններին մեկ տարուց էլ պակաս ժամանակ է մնացել, և Անկարան պետք է կայունացնի իր տնտեսությունը:
Հոդվածագրի կարծիքով՝ Սոչիի բանակցություններում ձեռք բերված պայմանավորվածությունները՝ Թուրքիայի կողմից ռուսական գազի դիմաց ռուբլով վճարելուն մասնակի անցնելու վերաբերյալ, կկայունացնեն լիրան և կկանխեն թանկացումների նոր ալիքը։ Եվ դա տեղի է ունեցել անմիջապես այն բանից հետո, երբ Թուրքիայի ոսկու և արտարժույթի պաշարներն արդեն ավելացել են՝ շնորհիվ ռուսական պետական միջուկային էներգիայի կորպորացիայի՝ «Ռոսատոմի» թուրքական դուստր ձեռնարկությանը՝ Միջերկրական ծովի ափին ատոմակայան կառուցելու համար միջոցների փոխանցմամբ։
Ավելին, հիշեցնում է թերթը, Անկարան ձեռնպահ է մնում Մոսկվայի դեմ արևմտյան պատժամիջոցներին միանալուց։
Էրդողանը ցանկանում է խորացնել Ռուսաստանի հետ տնտեսական կապերը՝ առանց ՆԱՏՕ-ի ավանդական դաշնակիցների հետ լիակատար խզում հրահրելու։
Անցած շաբաթվա վերջին Սոչիում բանակցություններ են վարել Վլադիմիր Պուտինն ու Ռեջեփ Թայիփ Էրդողանը։ Նրանք վերահաստատել են երկկողմ համագործակցության ամրապնդմանն ուղղված իրենց հանձնառությունը և, ի թիվս այլ բաների, պայմանավորվել են, որ ռուսական գազի մատակարարումները Թուրքիա մասամբ վճարվելու են ռուբլով։
Անցյալ տարվա նոյեմբերին թուրքական լիրան անկում է ապրել 18 տոկոսով՝ սա վերջին 20 տարվա առավելագույն անկումն էր, իսկ դեկտեմբերի 20-ին սահմանվեց ռեկորդ՝ 18,4 լիրա մեկ դոլարի դիմաց։ Տարեկան գնաճը, ազգային արժույթի տատանումների ֆոնին, արագացել է՝ հասնելով մինչև 36 տոկոսի։
Տաթև Ֆռանգյան
