13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
«Փաշինյանի հետ կառուցողական հեռախոսազրույց ենք ունեցել»․ Էրդողանը խոսել է Հայաստանի հետ հարաբերությունների կարգավորման գործընթացից
Քաղաքականություն
08.08.2022 | 17:23
Թուրքիայի նախագահ Ռեջեփ Թայիփ Էրդողանն Անկարայում անցկացվող Դեսպանների 13-րդ համաժողովում ունեցած ելույթում անդրադարձել է նաև Հայաստանի հետ հարաբերություններին, գրում են թուրքական լրատվամիջոցները։
Էրդողանը ևս անգամ հայտարարել է, որ հենց Թուրքիայի աջակցությամբ է Ադրբեջանը հաղթել Արցախյան երկրորդ պատերազմում։
«Ձեռք բերված պայմանավորվածություններով Հարավային Կովկասում նոր դարաշրջան է սկսվել։ Մենք մեծ ջանքեր ենք գործադրում՝ այս պատմական հնարավորությունը չկորցնելու համար։ Մինչ օրս մենք Ադրբեջանի հետ սերտ խորհրդակցությամբ բազմաթիվ քայլեր ենք ձեռնարկել»,- հայտարարել է Էրդողանը։
Նա նշել է, որ չնայած, իբր, «ռադիկալ հայերի սաբոտաժին»՝ զգալի առաջընթաց են գրանցել Կովկասում մշտական խաղաղության հաստատման ուղղությամբ։
«Հայաստանի հետ բանակցությունները շարունակվում են, որոնք սկսել ենք հատուկ ներկայացուցիչների միջոցով։ Վարչապետ Փաշինյանի հետ կառուցողական զրույց ենք ունեցել, երբ զանգահարել էր Կուրբան Բայրամի կապակցությամբ։ Տարածաշրջանում կլինի կայունություն, եթե Հայաստանն արձագանքի Ադրբեջանի և Թուրքիայի անկեղծ կոչերին»,- ասել է Էրդողանը։
Հիշեցնենք, որ Փաշինյանի և Էրդողանի հեռախոսազրույցը տեղի է ունեցել հուլիսի 11-ին։
Էմմա Չոբանյան
