Քաղաքականություն
08.08.2022 | 16:00
ՌԴ նախագահ Վլադիմիր Պուտինի և Ուկրաինայի նախագահ Վլադիմիր Զելենսկիի հանդիպումը հնարավոր է միայն այն բանից հետո, երբ երկու երկրների բանակցողների պատվիրակությունները կկատարեն իրենց «տնային աշխատանքը»։ Իսկ հիմա ամենաբարձր մակարդակով բանակցություններ վարելու նախադրյալներ չկան։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է ՏԱՍՍ-ը։
«Ինչ վերաբերում է նախագահներ Պուտինի և Զելենսկիի միջև բարձր մակարդակով հանդիպմանը, ապա դա հնարավոր է այն բանից հետո, երբ բանակցող պատվիրակությունները անեն ամբողջ տնային աշխատանքը։ Այդ տարրը ևս բացակայում է։ Դրա համար պարոն Էրդողանի կողմից նշված անհրաժեշտ նախադրյալները ներկայում չկան»,- ասել է Պեսկովը՝ մեկնաբանելով Թուրքիայի նախագահ Ռեջեփ Թայիփ Էրդողանի՝ Պուտինի և Զելենսկիի միջև բանակցություններ կազմակերպելու առաջարկը։
Պեսկովը նաև ուշադրություն է հրավիրել այն հանգամանքին, որ Էրդողանը բազմիցս առաջարկել է իր ծառայությունները և ջանքեր գործադրել՝ Ուկրաինայում խաղաղ գործընթաց նախաձեռնելու համար։
«Մենք գիտենք, որ նրա դերը շատ մեծ է ռուսական և ուկրաինական պատվիրակությունների միջև բանակցությունների մի քանի փուլերի շատ լավ պայմանների կազմակերպման գործում։ Եվ Թուրքիայի նախագահը շարունակում է նման քաղաքական կամք արտահայտել՝ ջանքեր գործադրելով՝ օգնելու նման գործընթացին»,- ասել է Պեսկովը՝ խոսելով օգոստոսի 5-ին Սոչիում կայացած Պուտինի և Էրդողանի հանդիպման արդյունքների մասին։
Միաժամանակ, Պեսկովն ասել է, որ բանակցությունների ուկրաինական պատվիրակությունը«ռադարներից դուրս է եկել»։
«Այդ առումով հիմա որևէ բանակցային գործընթաց չկա»,- ասել է Կրեմլի խոսնակը։
Էմմա Չոբանյան
