22.04.2026 | 10:17
Արտարժույթների փոխարժեքները՝ ապրիլի 22-ի դրությամբ
Թուրքիան հայտարարել է, որ քանի դեռ իր պահանջները չեն կատարվել, ՆԱՏՕ-ին Շվեդիայի և Ֆինլանդիայի անդամակցությունը չի վավերացնի
Քաղաքականություն
05.08.2022 | 21:40
Անկարան ուշադիր հետևելու է Շվեդիային ու Ֆինլանդիային և չի վավերացնի նրանց անդամակցությունը ՆԱՏՕ-ին, եթե այդ երկրները քայլեր չձեռնարկեն՝ բավարարելու Թուրքիայի պահանջը։ Այս մասին հայտարարել է Թուրքիայի արդարադատության նախարար Բեքիր Բոզդաղը, գրում են թուրքական լրատվականները։
Հիշեցնենք՝ Անկարան պահանջում է արտահանձնել բոլոր այն անձանց, որոնք Թուրքիայում ահաբեկիչներ են համարվում։
«Թուրքիան նախկինում 33 ահաբեկիչների արտահանձման պահանջ էր ներկայացրել։ Մենք թարմացրել ենք այդ հարցումներից մի քանիսը, ուղարկել նաև նորերը, սակայն մինչ այժմ պաշտոնյաներից որևէ պատասխան չենք ստացել»,- ասել է Բոզդաղը։
«Եթե Շվեդիայի և Ֆինլանդիայի կառավարությունները կատարեն ՆԱՏՕ-ին անդամակցելու իրենց խոստումները, Թուրքիան կպահի իր խոսքը և անհրաժեշտ քայլեր կձեռնարկի՝ գործընթացն ավարտին հասցնելու համար։ Բայց եթե նրանք չկատարեն իրենց խոստումները, Թուրքիան կրկին կպահի իր խոսքը և քայլեր չի ձեռնարկի»,- ասել է Բոզդաղը։
Հավելենք, որ Թուրքիան Շվեդիայի և Ֆինլանդիայի՝ ՆԱՏՕ-ին անդամակցության վետոն հանեց այն բանից հետո, երբ երեք երկրները հուշագիր ստորագրեցին, որի համաձայն՝ Սկանդինավյան երկրներն Անկարային են արտահանձնելու «ահաբեկիչներին»։ Թուրքիան էլ գրավոր հարցում է ուղարկել Շվեդիային և Ֆինլանդիային՝ պահանջելով արտահանձնել «Քուրդիստանի աշխատավորական կուսակցության» և FETO-ի՝ Գյուլենական շարժման ներկայացուցիչներին։
Շվեդիայի և Ֆինլանդիայի իշխանություններն էլ վստահեցրել էին, որ կատարելու են ահաբեկչության դեմ պայքարի վերաբերյալ Թուրքիայի հետ ձեռք բերված պայմանավորվածությունները, սակայն, դրա հետ մեկտեղ, չէին երաշխավորել քրդերի արտահանձնումը թուրքական դիմումների համաձայն։ Նրանք նշել էին, որ արտահանձնման որոշումը կայացնելու է դատարանը և գործընթացները տեղի են ունենալու երկրների օրենսդրությանը համապատասխան։
Էմմա Չոբանյան
