ԱՄՆ-ը հետաձգել է հրթիռների փորձարկումը՝ Թայվանի շուրջ լարվածությունը թուլացնելու համար

Սպիտակ տունը «ազատ և բաց հնդկախաղաղօվկիանոսյան տարածաշրջանը» պաշտպանելու մի շարք քայլերի մասին է հայտարարել այն բանից հետո, երբ հինգշաբթի Չինաստանն առնվազն 11 բալիստիկ հրթիռ է արձակել Թայվանի շրջակա ջրերում, գրում է VOA-ն:

Հրթիռների արձակումը տեղի է ունեցել ԱՄՆ Ներկայացուցիչների պալատի խոսնակ Նենսի Փելոսիի այցից մեկ օր անց, ինչը հարուցել էր Պեկինի զայրույթը:

«Չինաստանը որոշել է չափից ավելի արձագանքել և օգտագործել խոսնակի այցը որպես պատրվակ՝ ուժեղացնելու սադրիչ ռազմական գործողությունները Թայվանի նեղուցում և շրջակայքում»,- ասել է ԱՄՆ Ազգային անվտանգության խորհրդի ռազմավարական հաղորդակցության համակարգող Ջոն Քիրբին:

Քիրբին լրագրողներին ասել է, որ պաշտպանության նախարար Լլոյդ Օսթինը հանձնարարել է USS Ronald Reagan ավիակրի և նրա հարվածային խմբի նավերի հրամանատարնարին մնալ տարածքում՝ «իրավիճակը վերահսկելու համար»։

Վաշինգտոնը նաև «ստանդարտ օդային և ծովային անցումներ» կիրականացնի Թայվանի նեղուցով առաջիկա շաբաթների ընթացքում, ասել է նա։

Քիրբին խոստացել է «հետագա քայլեր» ձեռնարկել՝ ցույց տալու ԱՄՆ-ի նվիրվածությունն իր դաշնակիցներին, ներառյալ Ճապոնիային, որը հայտարարել է, որ հինգ չինական հրթիռներ ընկել են իր բացառիկ տնտեսական գոտում:

Չինաստանը փորձում է փոխել ստատուս քվոն Թայվանում, ասել է Քիրբին՝ հավելելով, որ Վաշինգտոնը հետաձգում է ռազմաօդային ուժերի Minuteman III միջմայրցամաքային բալիստիկ հրթիռի վաղուց ծրագրված փորձարկումը՝ լարվածությունը թուլացնելու համար։

«Իհարկե, մենք ցանկանում ենք, որ լարվածությունը նվազի»,- ասել է Քիրբին:

Տաթև Ֆռանգյան