16.09.2026 | 16:20
Կոսովոյի նախկին նախագահ Հաշիմ Թաչին ռազմական հանցագործությունների համար դատապարտվել է 25 տարվա ազատազրկման
Պուտինը հույս է հայտնել, որ այսօր Թուրքիայի հետ առևտրատնտեսական կապերի զարգացման հուշագիր կստորագրեն
Քաղաքականություն
05.08.2022 | 19:23
ՌԴ նախագահ Վլադիմիր Պուտինը Սոչիում Թուրքիայի նախագահ Ռեջեփ Թայիփ Էրդողանի հետ բանակցությունների մեկնարկին հույս է հայտնել, որ Ռուսաստանին ու Թուրքիային կհաջողվի հուշագիր ստորագրել առևտրատնտեսական կապերի զարգացման վերաբերյալ, գրում են ռուսական լրատվամիջոցները։
«Ինչպես պայմանավորվել ենք, հուսով եմ, որ այսօր մեզ կհաջողվի համապատասխան հուշագիր ստորագրել մեր առևտրատնտեսական կապերի զարգացման վերաբերյալ՝ հաշվի առնելով այն պայմանավորվածությունները, որոնք ձեռք են բերվել մեր պատվիրակության կողմից Թուրքիայում աշխատելու ընթացքում»,- ասել է Պուտինը։
Բացի այդ Պուտինը Էրդողանին անձամբ շնորհակալություն է հայտնել հացահատիկի, այդ թվում՝ ռուսական արտադրանքի և պարարտանյութերի մատակարարման հարցում պայմանավորվածությունների ձեռքբերման գործում ունեցած դերի համար։ ՌԴ նախագահը նաև նշել է, որ քննարկվելու է Սիրիայում տիրող իրավիճակը։
«Իհարկե, մենք կխոսենք նաև այն խնդիրների մասին, որոնց երկար ժամանակ առնչվում ենք։ Նկատի ունեմ տարածաշրջանի անվտանգության խնդիրները, առաջին հերթին՝ սիրիական ճգնաժամը։ Այստեղ Թուրքիան և Ռուսաստանը շատ մեծ ներդրում ունեն իրավիճակի կարգավորման գործում։ Եվ մենք, իհարկե, նույնպես կանդրադառնանք այդ թեմային»,-ասել է Պուտինը։
Էմմա Չոբանյան
