Բերդից հետո Ոսկեպարում․ ինչո՞ւ է ավելանում ՌԴ հենակետերի թիվը, ՊՆ-ն լուռ է․ ՏԵՍԱՆՅՈՒԹ

Տավուշի մարզի Ոսկեպար գյուղում շինարարություն է ընթանում, Factor TV-ի տեսախցիկն է արձանագրել։ Դատելով տարածքում տեղադրված ռուսական դրոշի գույներով երկաթե տնակից՝ ռուսական ուժերի հերթական հենակետն է կառուցվում։  Տավուշի մարզպետարանից լուրը մեկնաբանել չցանկացան՝ հորդորելով տեղեկությունը պատկան մարմիններից ճշտել։

Փաստ է, որ ռուսական հենակետ է կառուցվում, մեզ հետ զրույցում նշեց Բաղանիսի վարչական ղեկավար Գևորգ Սահակյանը, բայց, ասաց, ավելին չգիտի։

Օրեր առաջ Տավուշի մարզ այցելած քաղաքագետ Սարո Սարոյանն էլ հաստատեց լուրը։ Նա չի բացառում, որ հենակետերի տեղադրումը կարող է տարածքային զիջումների մասին վկայել։

Տավուշի Բերդ համայնքում ռուսական մեկ այլ հենակետի կառուցման մասին Factor TV-ն գրել էր դեռևս 2 ամիս առաջ։ Այդ ժամանակ մենք պարզաբանում էինք խնդրել նաև Պաշտպանության նախարարությունից՝ փորձելով ճշտել ՀՀ տարածքում ռուսական հենակետ տեղակայելու անհրաժեշտությունը և ստացել էինք այսպիսի պատասխան․ «Տավուշի մարզի Բերդ համայնքում ՝ նախկին օդանավակայանի տարածքում, ռուսական ռազմական օբյեկտների կառուցման հարցի վերաբերյալ ՀՀ Պաշտպանության նախարարությունը պաշտոնական տեղեկություն չունի։ Հայ-ադրբեջանական սահմանի նշված հատվածում ՀՀ պետական սահմանի պահպանությունը և պաշտպանությունն իրականացվում է ՀՀ ԶՈՒ զորամիավորման համապատասխան ստորաբաժանման կողմից»։

Տավուշի մարզում ռուսական հենակետերի տեղադրման մեկ այլ հավանական պատճառ, քաղաքագետ Սարո Սարոյանի կարծիքով, Կառավարության նիստում այսօր հնչած մի միտք է։ Վարչապետը հայտարարեց, որ Հայաստանն այսօր էլ պատրաստ է ապահովել ադրբեջանցիների տեղաշարժը ՀՀ տարածքով դեպի Նախիջևան։

Եթե Ադրբեջանն օգտվի այդ հնարավորությունից, ըստ Սարոյանի, տեղաշարժը ամբողջությամբ հսկելու է Ռուսաստանը։

Արցախի վերջին իրադարձությունները, նաև՝ Խծաբերդի, Փառուխի և Քարագլխի դեպքերը, վառ օրինակն են այն բանի, որ ռուս խաղաղապահ զորախումբն իր գործառույթները չի կատարում, ավելին՝ Ադրբեջանի հետ երբեմն գործարքի է գնում, նշում է Սարոյանը։ Ըստ քաղաքագետի՝ նման իրավիճակ նաև Հայաստանի հարավարևելյան սահմանին կարող է առաջանալ։

Մանրամասները՝ տեսանյութում։

Սաթենիկ Հայրապետյան