15.04.2026 | 19:05
Լևոն Տեր-Պետրոսյանը իր առանձնատանը հյուրընկալել է Իրանի դեսպանին
Ադրբեջանը ԼՂ-ում իրադրության սրման գնաց, երբ Կոռնիձոր-Տեղ Մ12 ճանապարհի շինարարությունը մեկնարկեց․ ՀՀ վարչապետ․ ՏԵՍԱՆՅՈՒԹ
Քաղաքականություն
04.08.2022 | 11:48
«Ադրբեջանը ԼՂ-ում իրավիճակի սրման գնաց այն օրերին, երբ Կոռնիձոր-Տեղ Մ 12 ճանապարհի բուն շինարարությունը մեկնարկեց: Այս պայմաններում Ադրբեջանի կողմից սրացման գնալը մի նպատակ ունի՝ 2020-ի նոյեմբերի 9-ի հայտարարությամբ սահմանված կառուցակարգերի վերացումը»,- այս մասին, այսօր՝ օգոստոսի 4-ին, Կառավարության նիստում հայտարարեց վարչապետ Նիկոլ Փաշինյանը:
«Ադրբեջանը, որը նոյեմբերի 9-ի հայտարարությունն իր հաղթանակն է համարում, այսօր մի խնդիր ունի՝ վերացնել այդ հայտարարությունը և խուսափել այդ հայտարարությամբ արձանագրված իրողությունների ամրագրումից:
Նոյեմբերի 9-ի հայտարարությամբ 3 առանցքային իրողություն է արձանագրվել․ ԼՂ միավորի գոյությունը, ԼՂ-ում շփման գծի առկայությունը և ԼՂ-ի ու ՀՀ-ի միջև կապը երաշխավորող Լաչինի միջանցքի գոյությունը։ Այս ընթացքում թղթի վրա գված այս իրողությունները, այսպես ասած, շատ չենք ցանկացել ընդգծել, բայց սրանք իրողություններ են և Ադրբեջանի միջազգային պարտավորությունն են»,- նշեց վարչապետը։
«Ադրբեջանն այսօր շատ է թմբկահարում, որ Հայաստանը նոյեմբերի 9-ի հայտարարությամբ ստանձնել է պարտավորություններ։ Այո՛, մենք ստանձնել ենք պարտավորություններ և բոլորը կատարել ենք, Ադրբեջանն էլ պետք է կատարի իր երեք պարտավորությունները:
Ադրբեջանը պետք է ընդունի Ադբրեջանի նախագահի ստորագրությամբ արձանագրված ԼՂ միավորի գոյությունը, պիտի հարգի ԼՂ-ում շփման գծի առկայությունը, և պետք է հարգի Լաչինի միջանցքի գոյությունը, որը ՀՀ-ի հետ ԼՂ կապը ապահովող կարևորագույն ինստիտուտն է:
Ադրբեջանը պարտավոր է կատարել այս երեք պարտավորությունները, եթե ոչ, ապա մենք պետք է մեր օրակարգում ներառենք սեփական ստորագրությամբ ստանձնած պարտավորությունները հարգելուն ուղղված միջազգային մեխանիզմների գործարկումը»,- նշեց Փաշինյանը:
Մանրամասները՝ տեսանյութում:
