Մենք որևէ պլանի համաձայնություն չենք տվել․ Փաշինյանը՝ Լաչինի միջանցքի մասին․ ՏԵՍԱՆՅՈՒԹ

«Ընթացիկ էսկալացիայի համար Ադրբեջանը որպես պատրվակ օգտագործում է Լաչինի միջանցքի  նոր երթուղու հարցը, իբր ինքն ավարտել է Լաչինի միջանցքի նոր երթուղու կառուցման աշխատանքները, հետևաբար, գործող միջանցքի մի շարք հատվածներ պետք է հանձնվեն իր հսկողությանը»,- այս մասին, այսօր՝ օգոստոսի 4-ին, Կառավարության նիստում հայտարարեց վարչապետ Նիկոլ Փաշինյանը:

«Ադրբեջանի նման ձևակերպումները և հայտարարությունները նույնպես 2020-ի նոյեմբերի 9-ի եռակողմ հայտարարության կոպիտ խախտում են, և ահա թե ինչու. նշված հայտարարության 6-րդ կետում ասվում է. «Կողմերի՝ այսինքն՝ Հայաստանի, Ադրբեջանի և Ռուսաստանի համաձայնեցմամբ առաջիկա երեք տարվա ընթացքում՝ մինչև 2023-ի նոյեմբերի 9-ը, կորոշվի ԼՂ-ի՝ Հայաստանի հետ կապն ապահովող Լաչինի միջանցքով երթևեկության նոր երթուղու կառուցման պլանը՝ ռուսական խաղաղապահի կոնտինգենտի հետագա վերաբաշխմամբ, վերատեղաբաշխմամբ այդ երթուղու  պահպանության համար»:

Այս պահի դրությամբ ՌԴ-ի, Հայաստանի և Ադրբեջանի կողմից եռակողմ ֆորմատով հաստատված որևէ պլան գոյություն չունի, և մենք մի քանի անգամ առաջարկել ենք, հիմա էլ առաջարկում ենք դա անել, այսինքն՝ հաստատել եռակողմ ֆորմատով պլան:

Ուշադրություն դարձրեք, որ հայտարարության մեջ խոսքը ոչ թե պարզապես նոր ճանապարհի կառուցման մասին է, այլ կառուցման պլանի և խաղաղապահ զորքերի վերատեղաբաշխման մասին, որը շատ բարդ ու եռակողմ գործընթաց է:

Այս  պահի դրությամբ մենք ոչ մի պլանի համաձայնություն չենք տվել, որովհետև մեզ նման պլանի նախագիծ չի էլ առաջարկվել:

Չնայած պիտի ընդգծեմ, որ Հայաստանն սկսել է Կոռնիձոր-Տեղ Մ 12 մայրուղու ավտոճանապարհի վերակառուցումը, որը ենթադրաբար պետք է միանա Լաչինի միջանցքի նոր երթուղուն, բայց, կրկնում եմ, եռակողմ հայտարարության մեջ խոսքը միայն նոր ճանապարհի կառուցման մասին չէ, պլանի շրջանակներում պետք է պարզաբանվեն մի շարք կարևորագույն հարցեր, այդ թվում՝ ԼՂ-ի էլեկտրաէներգիայի, գազի մատակարարման հարցեր, անվտանգության հետ կապված խնդիրներ»,- նշեց Փաշինյանը:

Մանրամասները՝ տեսանյութում: