09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Ուկրաինայի HIMARS համակարգերից հարվածները խուճապ են առաջացրել ռուս զինվորականների շրջանում․ ISW
Քաղաքականություն
03.08.2022 | 13:25
Ռուսաստանի Պաշտպանության նախարարությունը, ամենայն հավանականությամբ, փորձում է մեղմել այն խուճապը, որ առաջացել է Ուկրաինայի կողմից ամերիկյան HIMARS MLRS համակարգերի արդյունավետ օգտագործումից։ Այս մասին ասվում է Պատերազմի ուսումնասիրման ամերիկյան ինստիտուտի (ISW) հերթական հաշվետվությունում։
Ըստ ամփոփագրի՝ այդ պատճառով ռուսական կողմն իրականությանը չհամապատասխանող հայտարարություններ է անում այդ համակարգերի ոչնչացման մասին։ Ռուսաստանի պաշտպանության նախարար Սերգեյ Շոյգուն երեքշաբթի Ռուսաստանի ԶՈՒ ղեկավարության հետ հանդիպման ժամանակ հայտարարել էր, թե ռուսական զորքերը ոչնչացրել են վեց HIMARS արձակման կայաններ և այլ զինտեխնիկա, որոնք Արևմուտքը մատակարարել է Ուկրաինային։
ՌԴ Պաշտպանության նախարարությունը նաև տեսանյութ է հրապարակել, որում պնդում է, որ օգոստոսի 1-ին Խարկովի մարզում երկու շենք է ավերվել, որոնցում HIMARS համակարգեր կային։ Այնինչ, Ուկրաինայի «Հարավ» օպերատիվ հրամանատարության ղեկավար Անդրեյ Կովալչուկը պնդել է, որ ռուսական զորքերը «ոչ մի HIMARS չեն ոչնչացրել», իսկ ֆինն անանուն պաշտոնյան ռուսական հայտարարություններն անվանել է «ցանկություններն իրականության տեղ ներկայացնել»:
Ուկրաինայի ռազմական հետախուզության գլխավոր վարչությունը նաև հայտնել է, որ ՌԴ պաշտպանական գերատեսչությունը թաքցնում է ռուս զինվորականների կորուստները՝ ԶԼՄ-ներում չհրապարակելով ուկրաինական HIMARS-ի հարվածներից զոհերի թիվը, իսկ վիրավորներին տեղափոխելով քաղաքացիական մեքենաներով։ HIMARS համակարգերից հարվածները, ամենայն հավանականությամբ, կբարոյալքեն ռուս զինվորականներին, վերլուծության արդյունքներն ամփոփելով՝ նշում են ISW-ի փորձագետները:
Տաթև Ֆռանգյան
