16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ֆրենկ Փալոնը սխալ է անվանել ՄԱԿ-ի Գլխավոր վեհաժողովի նախագահի կողմից Հայոց ցեղասպանության հուշահամալիր այցելության մասին գրառումը ջնջելը
Քաղաքականություն
02.08.2022 | 16:23
ԱՄՆ կոնգրեսական Ֆրենկ Փալոնը սխալ է անվանել ՄԱԿ-ի Գլխավոր վեհաժողովի նախագահ Աբդուլլա Շահիդի կողմից Հայոց ցեղասպանության հուշահամալիր այցելության մասին իր իսկ գրառումը ջնջելը: Այս մասին Փալոնը գրառում է կատարել «Թվիթեր»-ի իր միկրոբլոգում:
«33 երկրներ, այդ թվում՝ ԱՄՆ-ը, պաշտոնապես ճանաչել են Հայոց ցեղասպանությունը: ՄԱԿ-ը չպետք է մեղսակից լինի Թուրքիայի կողմից պատմությունը մերժելուն: Աբդուլլա Շահիդը սխալ է եղել՝ ջնջելով իր թվիթը, տեղի տալով Թուրքիայի ճնշմանը»,- գրել է ամերիկացի կոնգրեսականը:
Հիշեցնենք, որ այցով Հայաստանում գտնվող ՄԱԿ-ի Գլխավոր վեհաժողովի նախագահ Աբդուլլա Շահիդն այցելել էր Ծիծեռնակաբերդ հուշահամալիր, ինչի մասին նաև գրառում էր արել թվիթերյան իր էջում։
«Ծաղկեպսակ խոնարհեցի Հայոց ցեղասպանության զոհերի հուշահամալիրում։ Հատուկ շնորհակալություն թանգարան-ինստիտուտի տնօրեն Հարություն Մարությանին ու Հասմիկ Մարտիրոսյանին՝ թանգարանում շրջայցի համար»,- ասված էր գրառման մեջ։
Որոշ ժամանակ անց, սակայն, գրառումը պարզապես հեռացվել է թվիթերյան էջից։
Տաթև Ֆռանգյան
