Քաղաքականություն
02.08.2022 | 15:11
Թուրքիան ռազմական ուժեր է ուղարկել Հյուսիսային Սիրիայի Հալեպ նահանգի՝ իր վերահսկողության տակ գտնվող տարածք։ Այս մասին հայտնում է Asharq al-Awsat-ը, որին վկայակոչում է «Ահվալ» գործակալությունը։
Հաղորդվում է, որ զինվորական շարասյունն ուղևորվել է Հալեպի բազա, որտեղից էլ ուժերը տեղակայվելու են նահանգի այլ վայրերում։ Ռազմական շարասյունը, որը ներառում է տեխնիկա, զրահափոխադրիչներ, զինամթերք, Սիրիա է մտել Բաբ ալ-Սալամահ անցակետից։ Անցյալ ամիս Թուրքիան մոտ 15 ռազմական շարասյուն էր ուղակել Հալեպի շրջակայք։
Հիշեցնենք, որ Թուրքիայի նախագահ Ռեջեփ Թայիփ Էրդողանը դեռ մայիսին էր սպառնացել Սիրիայում նոր ռազմական գործողություն սկսել քրդերի դեմ։ Պաշտոնապես Անկարան պնդում է, որ ցանկանում է 30 կմ-անոց «անվտանգության գոտի» ստեղծել սահմանին։
Պաշտոնական Վաշինգտոնն ու Մոսկվան բազմիցս դեմ են արտահայտվել Թուրքիայի նոր ռազմական գործողությանը։
Էմմա Չոբանյան
