06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ինչ իրավիճակ է գազալցակայաններում. չվկայագրված կամ չհերթագրված բալոններն օգոստոսի 1-ից չպիտի լիցքավորվեին․ ՏԵՍԱՆՅՈՒԹ
Հասարակություն
01.08.2022 | 21:15
Այսօրվանից գազալցակայաններում պետք է լիցքավորվեն միայն վկայագրված կամ վկայագրման համար լիցենզավորված ընկերություններում արդեն հերթագրված տրանսպորտային միջոցները։ Չնայած դրան՝ Factor TV-ի տեսախցիկն այսօր այլ պատկեր արձանագրեց․ գազալցակայաններից մեկում իմանալով, որ գազաբալոնը ո՛չ վկայագրված է, ո՛չ էլ հերթագրված, միևնույն է, լիցքավորեցին այն։
Մենք շրջեցինք նաև այլ լցակայաններում՝ հասկանալու՝ ի՞նչ պատկեր է օրենքի ուժի մեջ մտնելու հենց առաջին օրը, և արդյո՞ք պատասխանատուները հետևում են օրենքի պահանջին։ Լցակայանների աշխատակիցները հիմնականում խուսափում էին տեսախցիկի առաջ խոսել, բայց պնդում էին, որ միայն վկայագրումը կամ հերթագրումը հաստատող փաստաթղթի առկայության դեպքում են լիցքավորում։ Չնայած դրան՝ մենք արձանագրեցինք նաև դեպքեր, երբ լիցքավորելուց հետո էին միայն ստուգում փաստաթղթի առկայությունը։
«Որը գրանցված է, լիցքավորում ենք, որը թուղթ չունի՝ չենք լիցքավորում»,- ասաց լցակայաններից մեկի պատասխանատուն։
Ուշագրավ է, որ մեր տեսախցիկը նաև նման դեպք արձանագրեց․ վարորդներից մեկը գազալցակայան էր եկել վկայագրման հերթագրման մասին թղթով, որը, սակայն, նույնիսկ մեծ ցանկության դեպքում, դժվար է փաստաթուղթ անվանել։
Աշխատակիցն ասաց՝ բոլոր հերթագրվողների մոտ էլ նույն թուղթն է՝ առանց կնիքի և լիցենզավորված կազմակերպության անվան, բայց լիցքավորում են՝ վստահելով, որ հերթագրված է, կամ էլ պարզապես նրա համար, որ իրենց մշտական հաճախորդն է։
Գազալցակայաններից մեկում էլ չգիտեին՝ ինչպե՞ս պիտի ստուգեն, ի՞նչ պետք է անեն, միայն գիտեին, որ օրենքն այսօրվանից է գործելու․ կայանի պատասխանատուն տեսանկարահանվել չցանկացավ, բայց կադրից դուրս ասաց, որ անգամ էլեկտրոնային շտեմարանների մասին չեն լսել։
Թեև ՏԿԵ նախարարությունից վստահեցնում էին, որ էլեկտրոնային շտեմարաններն ամբողջությամբ պատրաստ են, բայց լցակայաններից մեկում ասացին, որ այն դեռ պատրաստ չէ, համենայն դեպս, իրենք շտեմարանի միջոցով չեն ստուգում՝ վկայագրվա՞ծ է գազաբալոնը, թե՞ ոչ։
Վարորդների շրջանում անցկացրած մեր հարցումը ցույց տվեց, որ նրանցից շատերը ևս լիարժեք պատրաստ չեն արդեն ուժի մեջ մտած կարգավորումներին, ոմանք էլ հրաժարվեցին փաստաթուղթը ցույց տալ։
Նոր կարգավորումն այսօր լարվածության պատճառ էր դարձել Լոռու մարզում։ Ստեփանավան-Վանաձոր ավտոճանապարհը բեռնատարներով փակած գյուղացիները դժգոհ էին, որ գազալցակայաններում հրաժարվել են լիցքավորել իրենց բեռնատարները, և ցորենը դաշտում է մնացել։ Ճանապարհը բացվել է միայն այն բանից հետո, երբ արձակուրդում գտնվող Նիկոլ Փաշինյանն անցել է այդ ճանապարհով, զանգահարել ՏԿԵ նախարարին, հանձնարարել՝ ժամկետանց գազաբալոնները ստուգում անցկացնել, եթե դրանք ենթակա են շահագործման, ապա վկայագիր տալ։
Մանրամասները՝ տեսանյութում։
Արփի Հակոբյան
