26.11.2024 | 10:37
Հզոր ցիկլոնի ներթափանցմամբ պայմանավորված՝ հանրապետության ողջ տարածքում սպասվում են տեղումներ
Չինաստանը չի զոհաբերի իր ազգային շահերը Վլադիմիր Պուտինի հետ բարեկամության զոհասեղանին․ Բորել
Քաղաքականություն
01.08.2022 | 22:08
Ռուսաստանը չի փլուզվի արևմտյան պատժամիջոցների ճնշման ներքո, բայց Արևմուտքի հետ հարաբերությունները խզելու գինը շատ բարձր կլինի Ռուսաստանի համար։ Այս մասին օգոստոսի 1-ին Մադրիդի Կոմպլուտենսե համալսարանի պարբերականում հրապարակված հոդվածում նշել է Եվրամիության արտաքին քաղաքականության ղեկավար Ժոզեպ Բորելը։
Նրա կարծիքով՝ Ռուսաստանի պարագայում պատժամիջոցների երկարաժամկետ հետևանքներն ավելի կարևոր կլինեն, քան կարճաժամկետները, քանի որ դրանք կվերորոշեն Ռուսաստանի տեղն աշխարհում։
«Այն (Ռուսաստանը) կարող է դիմակայել պատժամիջոցներին, սակայն դա մեծապես կազդի միջազգային համակարգում նրա դիրքի վրա, նրա միջազգային կարգավիճակն անխուսափելիորեն կնվազի։ Այն կդառնա եվրասիական երկիր՝ սահմանափակ առևտրով։ Համաշխարհային մակարդակում դա կլինի հսկայական փոփոխություն և, հավանաբար, Ուկրաինայի պատերազմի ամենակարևոր հետևանքը»,- գրել է Բորելը։
Նա խոստովանել է, որ ՌԴ ներկայիս ռեժիմը միջոցներ կգտնի գոյատևելու համար, քանի որ երկիրն ունի զգալի բնական պաշարներ, հատկապես՝ նավթ: Բայց պատժամիջոցները, անշուշտ, կհանգեցնեն Ռուսաստանում կենսամակարդակի վատթարացման և թույլ չեն տա, որ նրա տնտեսությունը զարգանա, երկիրը ստիպված կլինի թեքվել դեպի Չինաստան։
«Մի պետության համար, որն արդեն 30 տարի փորձում է վերականգնել իր գերտերության կարգավիճակը, Արևմուտքից խզման գինը շատ բարձր կլինի: Ռուսական ռեժիմը պետք է ընտրի քաղաքական գոյատևումը չինական թևի տակ՝ բարգավաճման փոխարեն: Չինաստանը հասկացել է, որ համաշխարհային տնտեսության մեջ ինտեգրումը բարեկեցության նախապայման է, մինչդեռ Պուտինը հակառակ ընտրությունն է կատարում»,- ընդգծել է դիվանագետը։
Բորելը համոզված է, որ Չինաստանը չի զոհաբերի իր ազգային շահերը Վլադիմիր Պուտինի հետ բարեկամության զոհասեղանին։
Տաթև Ֆռանգյան
