Գերմանական կործանիչները սկսել են պարեկել Բալթյան երկրների երկնքում

Գերմանիայի, Հունգարիայի և Իտալիայի կործանիչներն օգոստոսի 1-ից սկսել են պարեկել Բալթյան երկրների օդային տարածքում, ՆԱՏՕ-ի Baltic Air Policing առաքելության շրջանակում: Գերմանիայի Պաշտպանության դաշնային նախարարությունը Twitter-ում հայտարարել է ռազմաօդային ուժերի շահագործման մասին, գրում է DW-ի ռուսական ծառայությունը։

«Այսօրվանից Գերմանիայի ռազմաօդային ուժերը կստանձնեն Բալթյան երկրների օդային տարածքի պաշտպանությունը: Բունդեսվերը 2005 թվականից կանոնավոր կերպով մասնակցում է Air Policing-ին՝ ապահովելու միջազգային օդային տարածքում անվտանգությունը և Բալթյան երկրների ազգային ինքնիշխանությունը»,- ասված է գերատեսչության հաղորդագրության մեջ։

Նոր զորամիավորումները կփոխարինեն բելգիական, ֆրանսիական և իսպանական ստորաբաժանումներին, որոնք պարեկություն են իրականացնում տարածաշրջանում ապրիլից, ասել են ՆԱՏՕ-ից։

«Մի ժամանակաշրջանում, երբ Եվրոպայի անվտանգությունը հիմնովին փոխվել է Ուկրաինայի դեմ Ռուսաստանի պատերազմի հետևանքով, ՆԱՏՕ-ի կործանիչները պատրաստ են շուրջօրյա պաշտպանել դաշնակիցների օդային տարածքը: Մենք միշտ զգոն ենք»,- ասել է ՆԱՏՕ-ի խոսնակ Օանա Լունգեսկուն:

ՆԱՏՕ-ի դաշնակիցները հերթով հսկում են Էստոնիայի, Լատվիայի և Լիտվայի երկինքը՝ 2004 թվականին այդ պետությունների դաշինքին միանալուց հետո, քանի որ երեք երկրներն էլ չունեն իրենց սեփական կործանիչները: ՆԱՏՕ-ի առաքելության շրջանակում կործանիչները երկինք են բարձրանում, եթե օտար պետությունների ինքնաթիռները չեն պահպանում թռիչքի կանոնները կամ կապի մեջ չեն մտնում ավիադիսպետչերների հետ։

Տաթև Ֆռանգյան