16.09.2026 | 12:10
Փաշինյանը Հեսսենի խաղաղության մրցանակ կստանա // ԶՈՒ ԳՇ պետը գիշերային անակնկալ ստուգայց է կատարել․ ԼՈՒՐԵՐ
Թուրքիայի ընտրությունները քիչ ժամանակ են նշանակում տնտեսությունը «բուժելու» համար․ Bloomberg
Քաղաքականություն
27.07.2022 | 23:30
Թուրքիայի մոտեցող ընտրությունները նշանակում են, որ նեղ պատուհան կա գործելու՝ դրամավարկային քաղաքականությունը խստացնելու, գնաճին դիմակայելու ու լիրան պաշտպանելու համար: Այս մասին Bloomberg-ում գրում է Օնուր Անտը, փոխանցում է «Ահվալ» գործակալությունը։
Թուրքիայի կենտրոնական բանկը, գործելով նախագահ Ռեջեփ Թայիփ Էրդողանի հրամանով, տոկոսադրույքները իջեցրել է մինչև 14 տոկոս՝ անցյալ տարվա վերջին 19 տոկոսից։ Երկրում էլ գնաճը հասել է աննախադեպ ՝ մոտ 80 տոկոսի, թուրքական լիրան արժեզրկվել է։
Անտը, որը լրատվամիջոցի Թուրքիայի բյուրոյի ղեկավարն է, գրում է՝ Էրդողանը համաձայն չէ ներդրողների և տնտեսագետների հետ, որ դրամավարկային քաղաքականությունը պետք է փոխվի, որպեսզի գների դանդաղ աճը ապահովվի, իսկ լիրան ավելի քիչ խոցելի լինի։
Անտը նշում է, որ եթե նույնիսկ Էրդողանը մի կողմ թողնի իր համոզմունքը, որ բարձր տոկոսադրույքները խթանում են գնաճը, քաղաքական օրացույցը նրան գործելու քիչ տեղ է թողնում։
Ավելի բարձր տոկոսադրույքները կարող են ռեցեսիայի վտանգ ներկայացնել, և 2023-ի հունիսին նշանակված ընտրությունների դեպքում տոկոսադրույքների բարձրացման հավանականությունը փոքր է:
Ըստ Անտի՝ Էրդողանի համար լավագույն սցենարը խառնաշփոթն է առանց գնաճի համընդհանուր պայթյունի, լիրայի վաճառքի կամ տնտեսական կտրուկ անկման։
Էմմա Չոբանյան
