16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ռուբեն Վարդազարյանի հայտարարությունը համաձայնեցված չի եղել ԲԴԽ կազմի հետ. Մակյան․ ՏԵՍԱՆՅՈՒԹ
Հասարակություն
27.07.2022 | 14:14
«Դատական համակարգի ծանրաբեռնվածությունը խայտառակ մակարդակի է»,- Դատավորների ընդհանուր ժողովից առաջ լրագրողների հետ զրույցում այս գնահատականը տվեց ԲԴԽ անդամ Մեսրոպ Մակյանը՝ անդրադառնալով դիտարկմանը, որ 2018 թվականից ի վեր հարուցված կոռուպցիոն գործեր կան, որոնցով մինչ այժմ որոշումներ չեն կայացվել:
«Երբ ես նոր էի դատավոր աշխատում, Աջափնյակի դատարանը կարող էր տարեկան ստանալ 100 գործ, իսկ հիմա ամեն դատավորի վարույթում 200 քրգործ կա: Այդ պատճառով դատական նիստերը ձգձգվում են: Այնպես չէ, որ քաղաքական իշխանությունը միջամտում է, որ ձգձգվեն: Հակառակը, բոլորն այս պահին, այդ թվում քաղաքական իշխանությունը, շահագրգիռ են, որ նույն կոռուպցիոն գործերով կայացվեն դատական ակտեր»,- նշեց ԲԴԽ անդամը:
Հարցին՝ վեթինգից վախենո՞ւմ եք, Մեսրոպ Մակյանը պատասխանեց․ «Իհարկե, ոչ։ Վեթինգը ո՞րն է։ Տարբեր մարդիկ դրան տարբեր տեսանկյունից են նայում։ Մենք անցել ենք այդ ամենի միջով։ Կոռուպցիայի կանխարգելման հանձնաժողովը տվել է դրական եզրակացություն․ որևէ ռիսկ չի գտել։ Բարեվարքության հարցաթերթիկ եմ լրացրել և ստացել դրական եզրակացություն։ Կարծում եմ՝ վեթինգն անցել եմ»։
Անդրադառնալով հարցին, թե արդյոք ԲԴԽ նախկին նախագահ Ռուբեն Վարդազարյանի՝ 2020թ. նոյեմբերի 9-ի հայտնի հայտարարությունը ճնշում էր դատավորների վրա, Մակյանը նշեց, որ իր ուրույն կարծիքն ունի այդ հայտարարության վերաբերյալ, որը, սակայն, չի ցանկանում բարձրաձայնել, և հավելեց. «Դա Վարդազարյանի հայտարարությունն է, որն ինքն էլ բազմիցս մեկնաբանել է: Ես գնահատական կհնչեցնեի այդ հայարարության վերաբերյալ, եթե այն ԲԴԽ բոլոր անդամների հետ համաձայնեցված լիներ, բայց այդպես չէ»:
Հիշեցնենք՝ ԲԴԽ նախկին նախագահ Ռուբեն Վարդազարյանը դատավորներին կոչ էր արել հավատարիմ մնալ ժողովրդին տված երդմանն ու զերծ մնալ բոլոր տեսակի քաղաքական ճնշումներից և ազդեցություններից։ «…. Այսօր, թերևս, առարկայական ու վերջնական տրվելու է շուրջ երկու տարի ողջ հանրությանը ալեկոծած և դատավորներիս համար ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»,- նշված էր Վարդազարյանի հայտարարությունում:
Մանրամասները՝ տեսանյութում:
