09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Պատանի ըմբիշները Հռոմում մասնակցում են մինչև 17 տարեկանների աշխարհի առաջնությանը
27.07.2022 | 13:15
Հայաստանի հունահռոմեական ոճի ըմբշամարտի պատանեկան հավաքականն Իտալիայի մայրաքաղաք Հռոմում մասնակցում է աշխարհի մինչև 17 տարեկանների առաջնությանը. տեղեկացնում են ՀՀ ԿԳՄՍՆ-ից։
«Հայաստանի ներկայացուցիչներից հաջող մրցելույթներ է ունեցել և եզրափակիչ դուրս եկել 60 կգ քաշային Գասպար Տերտերյանը: Նա որակավորման փուլում 9:0 հաշվով հաղթանակ է տարել ԱՄՆ-ի ներկայացուցչի նկատմամբ, 1/8 եզրափակչում 2:1 հաշվով առավելության է հասել ղազախ ըմբիշի նկատմամբ, իսկ քառորդ եզրափակչում 8:0 հաշվով ուժեղ է գտնվել Թուրքիայի ներկայացուցչից:
Կիսաեզրափակչում էլ հայ ըմբիշը գոտեմարտել է իրանցի Հոսեին Միրշեքարի հետ և 5:1 հաշվով հաղթանակ տարել՝ ապահովելով առնվազն արծաթե մեդալ: Եզրափակչում Տերտերյանի մրցակիցը կլինի Ֆրանսիայի ներկայացուցիչ Լուկաս Լո Գրասոն:
Հայաստանի ներկայացուցիչներից մեդալի համար կպայքարի նաև 71 կգ քաշային Արարատ Վարդերեսյանը:
Վարդերեսյանը մեկնարկում 12:3 հաշվով առավելության է հասել իրանցի ըմբիշի նկատմամբ, 1/8 եզրափակչում 6:0 հաշվով հաղթել է Ֆինլանդիայի, քառորդ եզրափակչում՝ Ճապոնիայի ներկայացուցիչներին (10:1): Կիսաեզրափակչում էլ Վարդերեսյանը պարտություն է կրել ադրբեջանցի ըմբիշից և կպայքարի բրոնզե մեդալի համար:
Հայաստանի ներկայացուցիչներից մեդալ նվաճելուն մոտ է եղել նաև 48 կգ քաշային Տիգրան Գալստյանը: Վերջինս սփոփիչ գոտեմարտում 5:0 հաշվով հաղթել է Ղրղզստանի ներկայացուցչին, իսկ բրոնզե մեդալի համար պայքարում մրցել է ղազախ ըմբիշի հետ, որտեղ, սակայն, 3:5 հաշվով պարտություն է կրել:
65 կգ քաշային Անդրանիկ Սեդրակյանը ցավալի պարտություն է կրել սփոփիչ գոտեմարտում՝ զրկվելով բրոնզի համար պայքարելու հնարավորությունից:
Հայաստանի մյուս ներկայացուցիչները՝ 45 կգ քաշային Սամվել Խաչատրյանը, 51 կգ քաշային Արմեն Գևորգյանը և 55 կգ քաշային Հայկ Լյուդվիգյանը, պարտություններ են կրել ավելի վաղ փուլերում և դուրս են մնացել մեդալային պայքարից:
Ազատ ոճայինները պայքարը կսկսեն հուլիսի 29-ից: Հայաստանը կներկայացնեն Արման Հարությունյանը (45 կգ), Հայկո Գասպարյանը (48 կգ), Նարեկ Հակոբյանը (51 կգ), Արեն Սերոբյանը (55 կգ), Վլադիմիր Ազարյանը (60 կգ), Նարեկ Նիկողոսյանը (65 կգ), Ռազմիկ Եփրեմյանը (71 կգ), Պապին Հունանյանը (80 կգ) և Վարուժան Հովհաննիսյանը (92 կգ)»,- ասված է հաղորդագրությունում։
