20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Հնդկական ԱԹՍ-ները կհամալրե՞ն հայկական բանակը․Երևանը բանակցությունների մասին տեղեկությունը չի հերքում․ ՏԵՍԱՆՅՈՒԹ
Տեսանյութեր
26.07.2022 | 20:41
Հայաստանը, հնարավոր է ՝Հնդկաստանից ԱԹՍ-ներ գնի։ Այդ նպատակով հունիսին Երևանից Դելլի է մեկնել ՀՀ պաշտպանության նախարարությունը ներկայացնող պատվիրակություն, որը բանակցություններ է սկսել հնդիկ գործընկերների հետ։ Այս տեղեկությունն անանուն աղբյուրներին հղում անելով հայտնում է հնդկական DNA India լրատվամիջոցը։
Հնդկական լրատվամիջոցը հավաստիացնում է, որ հայկական պատվիրակությունը Հնդկաստան էր մեկնել զենքի գնումների ցուցակով, որում առանձնահատուկ տեղ են զբաղեցրել հնդկական դրոնները: Պաշտոնական Երևանն այս տեղեկությունները չի հերքում, սակայն, ՊՆ խոսնակը Factor TV-ին փոխանցեց, որ թեմայի շուրջ հարցերին կպատասխանեն միայն գրավոր։
Երևանում փորձագիտական շրջանակները դրական են գնահատում հայ-հնդկական ռազմական հնարավոր համագործակցությունը։ «Ազատ քաղաքացի» ՀԿ նախագահ Հովսեփ Խուրշուդյանի խոսքով՝ շուրջ երեք տասնամյակ Հայաստանը սպառազինության գերակշիռ ծավալները ձեռք է բերել ՌԴ-ից։ Հատկապես 44-օրյա պատերազմը ցույց տվեց այդ մոտեցման արդյունավետ չլինելը։
Պաշտոնական Երևանը որևէ հաղորդագրություն չի տարածել ոչ միայն պատվկիրակության այցի, այլ նաև հայ-հնդկական ռազմատեխնիկական հնարավոր համագործակցության շուրջ ընթացող բանակցությունների վերաբերյալ։ Հայաստանի պաշտպանության նախարարության պաշտոնական կայքում Հնդկաստան այցի վերաբերյալ որևէ տեղեկատվություն չկա։
ԱԺ «Պատիվ ունեմ» խմբակցության քարտուղար Տիգրան Աբրահամյանն այս փուլում տեղին է համարում ՊՆ-ի լռությունը։ Սակայն խորհրդարանական պաշտպանության ոլորտի հանձնաժողովի անդամը շեշտում է՝ կարևոր է սպառազինություն ձեռք բերելուց առաջ կարիքների ճշգրիտ գնահատում իրականացնել։
Առաջատար տեխնոլոգիաների ձեռնարկությունների միության գործադիր տնօրեն Հայկ Չոբանյանը հնդկական կողմի հետ հարաբերություններն անհրաժեշտություն է համարում։
Երևանում թեև ողջունում են հայ-հնդկական համագործակցությունն ռազմական ոլորտում, այուհանդերձ, մտավախություն կա, որ այս գործարքը կարող է տապալվել։ Հովսեփ Խուրշուդյանի դիտարկմամբ՝ եթե հնդկական մամուլում արտահոսք է եղել, ապա սա կարող է նշանակել, որ Նյու Դելին ցանկություն չունի ԱԹՍ-ներ վաճառել Երևանին։
Թե այս գործարքի բանակցություններ ինչ փուլում են՝ շարունակում է անհայտ մնալ։ Սակայն նկատելի է, որ 44-օրյա պատերազմից հետո հայ-հնդկական դիվանագիտական հարաբերություններն ակտիվացել են։ Մեկ տարվա ընթացքում Հայաստանի և Հնդկաստանի արտգործնախարարները երեք հանդիպում են ունցել, որից մեկը՝ Երևանում։
Նարեկ Կիրակոսյան
