Գերմանացի վերլուծաբանը համաշխարհային պատերազմ է կանխատեսել Չինաստանի հավակնությունների պատճառով

Չինաստանի հավակնությունները դուրս են գալիս Թայվանից և, եթե չվերահսկվեն, կարող են հանգեցնել համաշխարհային պատերազմի: Այս մասին զգուշացրել է միջազգային քաղաքականության փորձագետ, Նյու Յորքի Քարնեգիի խորհրդի միջազգային հարաբերությունների էթիկայի ավագ գիտաշխատող, Լյունեբուրգի համալսարանի էթիկայի և աստվածաբանության պատվավոր պրոֆեսոր Ալեքսանդր Գերլախը (Գերմանիա), հայտնում է Merkur.de-ն։

Գերմանացի վերլուծաբանը կանխատեսում է խոշոր ռազմական հակամարտություն. նա վստահ է, որ փոքրիկ վրիպում բավական է, որպեսզի Թայվանի հարցը վերածվի համաշխարհային պատերազմի։

« Վլադիմիր Պուտինը և Սի Ցզինպինը երկուսն էլ ցանկանում են փոխել առկա աշխարհակարգը։ Նրանց մտածելակերպը և վարքագիծը տրամագծորեն հակառակ է այն ամենին, ինչն այսօր բնորոշում է մեր աշխարհը»,- ասել է Գերլախը:

Փորձագետը կոչ է արել վերահսկել Չինաստանի և Թայվանի հարաբերությունները, քանի որ իրավիճակը, նրա կարծիքով, «շատ նման է» Ուկրաինայի հակամարտությանը։ «Ռուսները թերագնահատեցին ուկրաինական բնակչության դիմադրողականությունը։ Պեկինը հիմա տեսնում է, թե ինչ է տեղի ունենում, երբ հարձակման ենթարկված երկրի բնակչությունը չի կանգնում ճանապարհի եզրին և չի վանկարկում «Օվսաննա»: Այնուամենայնիվ, ես կարծում եմ, որ դա չի փոխի Թայվանի  բռնակցմանէ Չինաստանի երկարաժամկետ ռազմավարությունը»,- ասել է նա։

Գերլախի տվյալներով ՉԺՀ-ի ուժային օղակներում 2027 թվականն է նշվում որպես Թայվան հնարավոր ներխուժման  ժամկետ, «որովհետև այդ ժամանակ ՉԺՀ-ում ռազմական բարեփոխումները կավարտվեն»։
Միաժամանակ , ըստ փորձագետի , կոնկրետ ասել հնարավոր չէ , թե դա երբ տեղի կունենա, քանի որ որոշիչ են նաև այլ գործոններ։ Օրինակ՝ այն հարցը, թե ինչպես են թայվանցի զինվորականները պատրաստվում դիմագրավել Չինաստանից եկող սպառնալիքին»,- եզրափակել է նա։
Ավելի վաղ Չինաստանի պաշտպանության նախարարության խոսնակ Ու Ցիանը հայտարարել էր, որ ՉԺՀ-ի զինված ուժերը պատրաստ են ցանկացած պահի պատերազմ սկսել «թայվանցի անջատողականների դեմ» և «դադարեցնել արտաքին ուժերի փորձերը՝ հասնելու կղզու, այսպես կոչված, անկախությանը»՝ արձագանքելով ԱՄՆ հանրապետական սենատոր Ռիկ Սքոթի այցին Թայվան։

Տաթև Ֆռանգյան