17.01.2026 | 12:14
«Կայուն»-ից դեպի «դրական». Fitch Ratings-ը բարձրացրել է Հայաստանի վարկանիշի հեռանկարը
Վերսկսվել է գազի մատակարարումը «Հյուսիսային հոսք 1»-ով
Քաղաքականություն
21.07.2022 | 11:55
«Հյուսիսային հոսք 1» գազատարով (Nord Stream 1) ռուսական բնական գազի մատակարարումները Գերմանիա վերսկսվել են տեխնիկական սպասարկման աշխատանքներից հետո, այս մասին հայտնել է գազատարի օպերատորի ներկայացուցիչը, գրում է Delfi-ն։
Հաղորդվում է, որ գազամատակարարումը դադարեցվել էր հուլիսի 11-ին, և մտավախություն կար, որ Մոսկվան կարող է այն չվերականգնել հուլիսի 21-ին, ինչպես խոստացել էր: Nord Stream AG-ի ներկայացուցիչը հայտնել է, որ որոշ ժամանակ կպահանջվի, մինչև մատակարարումների ծավալը հասնի նախկին մակարդակին։ Ռուսական աղբյուրները,անանուն մնալու պայմանով Reuters-ին հայտնել են, որ գազամուղը կունենա օրական 160 միլիոն խորանարդ մետրից պակաս թողունակություն:
Կրեմլի կողմից վերահսկվող էներգետիկ հսկան՝ «Գազպրոմը» անցյալ ամիս կրճատեց գազի արտահանումը այդ գազատարով մինչև հզորության 40 %-ը՝ պատճառաբանելով Siemens Energy տուրբինի վերադարձի հետաձգումը, որը գտնվում էր Կանադայում՝ վերանորոգման նպատակով:
Իր հերթին, ըստ DW-ի, «Գազպրոմը» կկանգնեցնի ևս մեկ տուրբին։ Կանադայի իշխանությունները ի սկզբանե հրաժարվել էին վերադարձնել տուրբինը Ռուսաստանի դեմ պատժամիջոցների պատճառով։ Սակայն գերմանական կողմի հետ բանակցություններից հետո, չնայած Կիևի բողոքին, հուլիսի 17-ին տուրբինն ուղարկվեց Գերմանիա։ Դրա առաքման և ճշգրտումների համար կպահանջվի ևս 9-12 օր։ Արդյոք դրանից հետո ամբողջությամբ կվերսկսվի գազի մատակարարումը Nord Stream-ով, դեռ հայտնի չէ։
Տաթև Ֆռանգյան
