ԵՄ ԱԳ նախարարները քննարկելու են ՌԴ-ի դեմ պատժամիջոցների հարցերը

ԵՄ արտաքին գործերի խորհուրդն այսօր Բրյուսելում նախատեսում է քննարկում ունենալ Ուկրաինայի հետ կապված երեք ուղղություններով՝ աջակցություն Կիևին, ՌԴ-ի դեմ պատժամիջոցներ, միջազգային հանրության իրազեկում համակարտության հետևանքների մասին։ Այս մասին հայտնել է ԵՄ աղբյուրը, գրում է Ինտերֆաքսը։

«Առաջին մասով մենք ենթադրում ենք, որ տեղի կունենա  քննարկում  Ուկրաինային լրացուցիչ ռազմական աջակցություն ցուցաբերելու մասով»,-ասել է ԵՄ բարձրաստիճան  աղբյուրn՝ անանունության պայմանով։ Նա նշել է, որ քննարկվելու է նաև ՌԴ-ի դեմ պատժամիջոցների հարցը։

Ինչ վերաբերում է Կիևին ռազմական օգնությանը` Բրյուսելը ԵՄ խորհրդից ակնկալում է անդամ երկրների «քաղաքական որոշումը» հինգերորդ տրանշի վերաբերյալ՝ Եվրոպական խորհրդի հանձնարարականների համաձայն։

«Անդամ երկրները պետք է  ճանապարհ բացեն Եվրոպական խաղաղության հիմնադրամի հինգերորդ տրանշի համար։ Որոշումը երկուշաբթի չի ընդունվելու տեխնիկական պատճառով, բայց տեսնենք՝ կհաջողվի՞ հասնել համապատասխան քաղաքական որոշման»,-ասել է բարձրաստիճան պաշտոնյան։

Նա նշել է նաև, որ պատժամիջոցների մասով ևս որևէ որոշում չի ակնկալվում։ Պաշտոնյայի խոսքով՝ սա ինքնին պատժամիջոցների հերթական փաթեթը չէ։ Խոսքը գործող պատժամիջոցները պահպանելու, դրանք բարելավելու մասին է։ Գործողներին կավելացվեն որոշ միջոցներ, սակայն խոսքը ավելի շուտ բարելավելու, նախկին պատժամիջոցների փաթեթները համախմբելու մասին է;

Պաշտոնյան նաև հաստատել է, որ քննարկվելու է նաև ռուսական ոսկու արտահանման արգելքի հարցը։

«ԵՄ ռուսական ոսկու արտահանման արգելքի հարցը պետք է լինի միջոցների թվում, և դա խորհրդանշական միջոց չէ։ Հայտնի է, որ Ռուսաստանը ոսկու նշանակալի արտահանող է։ Գաղափարն այն է, որ փակենք նրա ֆինանսավորման ևս մեկ ծորակ»,-ասել է աղբյուրը։

Էմմա Չոբանյան