26.11.2024 | 10:53
Լարսը փակ է բեռնատարների համար
Զելենսկին գլխավոր դատախազի և անվտանգության ծառայության ղեկավարի պաշտոնանկությունները բացատրել է պետական դավաճանության գործերով
Քաղաքականություն
18.07.2022 | 12:02
Ուկրաինայի նախագահ Վլադիմիր Զելենսկին բացատրել է Ուկրաինայի անվտանգության ծառայության ղեկավար Իվան Բականովի և երկրի գլխավոր դատախազ Իրինա Վենեդիկտովայի պաշտոնանկության պատճառը։ Ուկրաինայի առաջնորդի տեսաուղերձը հրապարակվել է կիրակի՝ հուլիսի 17-ին, Telegram-ում, գրում է DW-ի ռուսական ծառայությունը։
Զելենսկու խոսքով՝ երկրում 651 քրեական գործ է հարուցվել դատախազության, նախաքննական և այլ իրավապահ մարմինների աշխատակիցների կողմից պետական դավաճանության գործով։ 198 քրեական գործի շրջանակներում համապատասխան անձինք որպես կասկածյալ են ներգրավվել։
Դատախազության և Ուկրաինային անվտանգության ծառայության ավելի քան 60 աշխատակիցներ մնացել են Ռուսաստանի կողմից օկուպացված տարածքներում և աշխատում են «մեր պետության դեմ», ասել է Զելենսկին։
Ուկրաինայի ազգային անվտանգության հիմքերի դեմ ուղղված հանցագործությունների նման զանգվածը, որն արձանագրվել է Ուկրաինայի իրավապահ մարմինների աշխատակիցների և Ռուսաստանի հատուկ ծառայությունների փոխգործակցության շրջանակներում, ստիպում է մեզ «շատ լուրջ հարցեր տալ համապատասխան ղեկավարներին», նշել է Ուկրաինայի նախագահը։ «Այս հարցերից յուրաքանչյուրին կտրվի պատշաճ պատասխան»,- խոստացել է նա։
Բականովն ու Վենեդիկտովան հուլիսի 17-ին Զելենսկու հրամանագրերով հեռացվել էին զբաղեցրած պաշտոններից։ Գլխավոր դատախազության ղեկավարի վերաբերյալ որոշումն ընդունվել է, մասնավորապես, «Ռազմական դրության իրավական ռեժիմի մասին» Ուկրաինայի օրենքի 11-րդ հոդվածի երկրորդ մասի համաձայն։
Ինչ վերաբերում է Բականովին, ապա նա հեռացվել է Ուկրաինայի զինված ուժերի կարգապահական կանոնադրության 47-րդ հոդվածի համաձայն։ Այս հոդվածում ասվում է, որ կասեցման հիմք է հանդիսանում մարտական պարտականությունները չկատարելը կամ ոչ պատշաճ կատարելը, որը հանգեցրել է կյանքի կորստի կամ այլ ծանր հետևանքների կամ ստեղծել նման հետևանքների վտանգ։
Տաթև Ֆռանգյան
