Երկարատև  բանակցություններ՝ Գյումրի-Արմավիր ճանապարհը փակած ցուցարարների հետ

Ինչպես տեղեկացրել էինք, այսօր կեսօրին Ախուրյան խոշորացված երկու  համայնքների՝ Գետքի և Ղարիբջանյանի բնակիչներն  ի նշան բողոքի՝ փակել էին Գյումրի-Արմավիր մայրուղին։ Նրանք պահանջում էին կարգավորել իրենց ոռոգման ջրի հարց, քանի որ բերքը փչանում է, գյուղացիները՝ սննանկանում։ Բանն այն է, որ այս գյուղերը երբևէ ոռոգման համակարգ չեն ունեցել։

Բողոքավորների հետ հանդիպել էին Շիրակի մարզպետարանի գյուղատնտեսության և բնապահապանության վարչության պետ Ռոման Համայակյանը, Ախուրյանի համայնքապետի տեղակալ Վարդան Իկիլիկյանը և պատասխանատուներ «Շիրակ» ՋՕԸ-ից։

Ռոման Համայակյանը մեզ տեղեկացրեց, որ ցուցարարները բացել են ճանապարհը, ինչից հետո երկար քննարկում է տեղի ունեցել Ղարիբջանյանի վարչական ղեկավար համայնքապետարանում, որըքիչ առաջ է ավարտվել։

«Ջրի պաշարի խնդիր  մեր մարզը չունի։ Այս երկու գյուղերը երբեք « Շիրակ» ՋՕԸ-ից չեն օգտվել, ընկերությունը նրանց ջուր չի տրամադրում, նրանք մակերեսային հոսքային ջրերով են իրենց դաշտերը ոռոգել։ Անցած տարի այսպիսի շոգեր չեն եղել, հիմա և՛ շոգն է անտանելի, և՛ ցանքատարածություններն են շատացրել։ Այս փուլում շատ կարևոր է ոռոգման ջուրը։ Գյուղացիները քննարկման ժամանակ առաջարկեցին իրենց տարբերակը,՝ օգտագործել  շարժական պոմպը, որը կարող է ջուր մղել և օգուտ տալ։ Մի տարբերակը դա է, երկրորդ տարբերակը՝ տեսնենք ՋՕ-ն հնարավորություն կունենա՞ ջուր ավելացնելու»,- ասաց մարզպետարանի պաշտոնյան։

Արմիկ Մովսիսյան