Քաղաքականություն
16.07.2022 | 12:26
Թուրքիայում ավարտվում են «Աքքույու» ԱԷԿ-ի վերջին՝ չորրորդ էներգաբլոկի հիմնարկեքի նախապատրաստական աշխատանքները, գրում է Անադոլու գործակալությունը։ Նշվում է, որ առաջին ատոմակայանի նախագծի իրականացման աշխատանքները շարունակվում են ըստ ժամանակացույցի։ Գործարկումից և շահագործումից հետո ԱԷԿ-ը արտադրելու է տարեկան մոտ 35 միլիարդ կՎտժ էներգիա։ Նախատեսվում է, որ էլեկտրակայանը կծածկի Թուրքիայի էլեկտրաէներգիայի կարիքների մինչև 10 տոկոսը: Նախագիծն, ընդհանուր առմամբ, ներառում է 4 էներգաբլոկ։
Աառաջին էներգաբլոկը շահագործման է հանձնվելու 2023թ-ին Թուրքիայի Հանրապետության հռչակման 100-ամյակին, մյուսները՝ մինչև 2026թ-ը մեկ տարվա տարբերությամբ։
«Աքքույու նյուքլեար» ընկերության տնօրենի տեղակալ Դմիտրի Ռոմանեցն էլ լրատվամիջոցին ասել է, որ չորրորդ էներգաբլոկի շինհրապարակում աշխատանքները զգալի առաջընթաց են գրանցել, փոսի փորումն ավարտվել է, իսկ հիմնական կառույցների բետոնե հիմքը լցվել է։
«Կարճ ժամկետում կսկսվեն հիմնական շենքերի հիմքերի հեղեղման աշխատանքները։ Բոլոր նախապատրաստական աշխատանքները ռեակտորի շենքում ավարտվել են։ Պատրաստվում ենք առաջիկայում հիմնարկեքին»,-ասել է Ռոմանեցը։
Հավելենք, որ«Աքքույու»-ն Թուրքիայի առաջին ատոմակայանն է, որ կառուցվում է Մերսին նահանգում «Ռոսատոմ» ընկերության կողմից։ Ատոմակայանի վերաբերյալ միջկառավարական համաձայնագիրը Թուրքիայի և ՌԴ-ի միջև կնքվել էր 2010 թվականի մայիսին։
Էմմա Չոբանյան
