25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Հունաստանի վարչապետը քննադատել է Թուրքիայի «մշտական ագրեսիվ պահվածքը»
Քաղաքականություն
07.07.2022 | 22:19
Հունաստանի վարչապետը հայտարարել է, որ Ուկրաինայում Ռուսաստանի պատերազմը «շրջադարձային կետ» է Եվրոպայում՝ ընդգծելով, որ պետք է խուսափել ցանկացած տիպի արդյունքից, որը կարող է քաջալերել մայրցամաքի այլ երկրների ագրեսիան, գրում է Turkish Minute-ը։
«Ուկրաինայի ճակատամարտը հերթական իրադարձությունը չէ միջազգային ասպարեզում։ Դա շրջադարձային է Եվրոպայի համար»,- ասել է Միցոտակիսը Եվրախորհրդարանում ունեցած ելույթում՝ նշելով, որ ապագայում նման դեպքերը պետք է կանխվեն։
Միցոտակիսը նշել է, որ նկատի ունի «Թուրքիայի մշտական ագրեսիվ պահվածքը», որի հետ հարաբերությունները վերջին երկու տարիների ընթացքում լարված են։ Չնայած երկուսն էլ ՆԱՏՕ-ի անդամ են՝ երկու երկրները տասնամյակներ տևած վեճեր ունեն մի շարք հարցերի շուրջ, այդ թվում՝ Էգեյան ծովում տարածքային պահանջների և Միջերկրական ծովի արևելյան հատվածում էներգետիկ հետախուզման իրավունքների վերաբերյալ:
«Մի բան հաստատ է՝ մեզ պետք չեն նոր ռևիզիոնիզմ և կայսերական ֆանտազիաների վերածնունդ։ Մեկ բան էլ է հաստատ՝ Հունաստանը երբեք չի հանդուրժի որևէ կասկած իր ազգային ինքնիշխանության և տարածքային ամբողջականության հարցում»,- ասել է Միցոտակիսը։
Նա նշել է, որ իր երկիրը «փակ է պահում դռները սպառնալիքների համար՝ բաց պահելով պատուհանները խաղաղ շփումների համար»:
«Ազգերի միջև վեճերը լուծվում են միջազգային իրավունքի հիման վրա, ոչ թե ահաբեկման միջոցով»,- ասել է Միցոտակիսը։
Հավելենք, որ Թուրքիայի նախագահ Ռեջեփ Թայիփ Էրդողանը վերջին շրջանում պարբերաբեր Հունաստանի հասցեին տարբեր սպառնալիքներ է հնչեցնում։
Էմմա Չոբանյան
