Իրանում ձերբակալել են մի քանի օտարերկրյա դիվանագետների՝ լրտեսության մեղադրանքով

Իսլամական հեղափոխության պահապանների կորպուսի աշխատակիցներն Իրանում ձերբակալել են մի քանի օտարերկրյա դիվանագետների, այդ թվում՝ Մեծ Բրիտանիայի փոխդեսպան Ջայլս Ուիթաքերին, հայտնում է իրանական Fars գործակալությունը։

Նշվում է, որ օտարերկրացին կասկածվում է լրտեսության մեջ։ Դիվանագետը, իբր, հողի նմուշներ է վերցրել։

Երկրի հետախուզական ծառայության տվյալներով՝ նմուշները վերցվել են Իրանի Քերման նահանգի Շեհդադ քաղաքի անապատի արգելված գոտում՝ հրթիռային փորձարկումների վայրի մոտակայքում։ Իրանական լրատվականի փոխանցմամբ՝ Ուիթաքերը վտարվել է տարածքից այն բանից հետո, երբ ներողություն է խնդրել:
Սակայն Մեծ Բրիտանիայի ԱԳՆ-ն հերքում է իրենց հպատակի կալանավորման փաստը։

«Իրանում բրիտանացի դիվանագետին կալանավորելու մասին տեղեկությունները կեղծ են»,- Reuters-ը մեջբերում է մի պաշտոնյայի հայտարարություն։

Ձերբակալված մյուս երկու օտարերկրացիներն Իրանում Ավստրիայի դեսպանատան մշակութային կցորդի ամուսինն ու Լեհաստանի համալսարանի պրոֆեսոր Մաչեյ Վալչակն են։ Վերջինը ձերբակալման պահին Իրանում է եղել որպես զբոսաշրջիկ։

Reuters-ի փոխանցմամբ՝ Իրանում վերջին տարիներին տասնյակ երկքաղաքացիներ և օտարերկրացիներ են ձերբակալվել, հիմնականում՝ լրտեսության և անվտանգության սպառնալիքի մեղադրանքով:

Իրավապաշտպան կազմակերպությունները Իսլամական Հանրապետությանը մեղադրել են անվտանգության սպառնալիքի մեղադրանքներով ձերբակալությունների միջոցով այլ երկրներից զիջումներ փնտրելու մեջ, որոնք կարող էին շինծու լինել։

Տաթև Ֆռանգյան