Ստորագրվել է Ուկրաինայի վերականգնման մասին հռչակագիրը

42 երկրների իշխանության ներկայացուցիչները ստորագրել են Ուկրաինայի վերականգնման վերաբերյալ համաժողովի ամփոփիչ հռչակագիրը, որն ավարտվել է շվեյցարական Լուգանո քաղաքում։ Այս մասին հայտնում է Korrespondent-ը։

Ստորագրողները «վճռականորեն դատապարտել են Ուկրաինայի դեմ Ռուսաստանի ռազմական ագրեսիան» և կոչ են արել Մոսկվային՝ անհապաղ դուրս բերել զորքերը։ Նրանք նաև ողջունել են քաղաքական, ֆինանսական և տեխնիկական աջակցություն տրամադրելու պարտավորությունները և հիմք են դրել Լուգանոյի սկզբունքներին։ Ըստ Կիևի՝ Ուկրաինայի վերականգնումը կարող է արժենալ մինչև 750 միլիարդ դոլար:

Հռչակագիրը ստորագրել են Ալբանիայի, Ավստրալիայի, Ավստրիայի, Բելգիայի, Հունաստանի, Դանիայի, Էստոնիայի, Իսրայելի, Իռլանդիայի, Իսլանդիայի, Իսպանիայի, Իտալիայի, Կանադայի, Կիպրոսի, Լատվիայի, Լիտվայի, Լիխտենշտեյնի, Լյուքսեմբուրգի, Մալթայի, Մոլդովայի, Նիդեռլանդների, Գերմանիայի, Նորվեգիայի, Հյուսիսային Մակեդոնիայի, Լեհաստանի, Պորտուգալիայի, Կորեայի Հանրապետության, Ռումինիայի, Սլովակիայի, Սլովենիայի, Մեծ Բրիտանիայի, ԱՄՆ-ի, Թուրքիայի, Ուկրաինայի, Հունգարիայի, Ֆինլանդիայի, Ֆրանսիայի, Խորվաթիայի, Ճապոնիայի պետությունների և կառավարությունների ղեկավարները, նախարարները և բարձր ներկայացուցիչներ, ինչպես նաև Եվրոպայի խորհրդի, Վերակառուցման և զարգացման եվրոպական բանկի, Եվրոպական հանձնաժողովի, Եվրոպական ներդրումային բանկի, Տնտեսական համագործակցության և զարգացման կազմակերպության բարձրաստիճան պաշտոնյաներ և բարձր ներկայացուցիչներ:

Հայտնի է դարձել նաև, որ պատերազմից հետո Ուկրաինայի առանձին շրջանների վերականգնումը հանձնարարվելու է կոնկրետ պետությունների։ Գործընկեր երկրների համապատասխան հաստատված ցուցակը ներկայացրել է վարչապետ Դենիս Շմիգալը։

Ցանկը ներառում է՝

• Գերմանիա – Չեռնիգովի մարզ
• Կանադա – Սումիի մարզ
• ԱՄՆ և Թուրքիա – Խարկովի մարզ
• Չեխիա, Ֆինլանդիա և Շվեդիա – Լուգանսկի մարզ
• Բելգիա – Նիկոլաևի շրջան
• Շվեդիա և Նիդեռլանդներ – Խերսոնի շրջան
• Շվեյցարիա – Օդեսայի մարզ
• Նորվեգիա – Կիրովոգրադի մարզ
• Ավստրիա – Զապորոժիեի մարզ
• Լեհաստան և Իտալիա – Դոնեցկի մարզ։

Տաթև Ֆռանգյան