13.01.2025 | 21:59
Հայաստանի մի շարք հասցեներում էլեկտրաէներգիայի անջատումներ կլինեն
Եթե նույնիսկ Թուրքիան ստանա արդիականացված F-16-եր, Հունաստանի ՌՕՈՒ-ն դեռ տեխնոլոգիական առավելություն կունենա․ Forbes
Քաղաքականություն
04.07.2022 | 22:09
Մադրիդում կայացած ՆԱՏՕ-ի գագաթնաժողովից հետո ԱՄՆ նախագահ Ջո Բայդենի և Հունաստանի վարչապետ Կիրիակոս Միցոտակիսի կողմից վերջին օրն արված հայտարարությունները կարող են որոշակի պատկերացում տալ հունական և թուրքական ռազմաօդային ուժերի իրավիճակի մասին մինչ այս տասնամյակի վերջը, գրում է Forbes-ը։
Նախագահ Բայդենը մամուլի ասուլիսում ասել է, որ ԱՄՆ-ն աջակցում է Թուրքիային արդիականացված F-16 կործանիչների վաճառքին։ Բայդենը նաև հերքել է այն պնդումները, որ F-16-երի վաճառքին իր հայտարարած աջակցությունը Շվեդիայի ու Ֆինլանդիայի՝ ՆԱՏՕ-ին անդամակցությանը Թուրքիայի վճռական հավանության դիմաց է՝ նշելով, որ ինքը նախկինում ևս իր հավանությունն է հայտնել:
Հունաստանի վարչապետ Կիրիակոս Միցոտակիսն էլ ՆԱՏՕ-ի գագաթնաժողովին ասել է, որ իր երկիրը դիմում է ուղարկել ԱՄՆ-ին՝ F-35 էսկադրիլիա գնելու հարցով։
Լրատվամիջոցը գրում է, որ եթե երկու գործարքներն էլ հաստատվեն, Հունաստանի ՌՕՈՒ-ն դեռ տեխնոլոգիական առավելություն կունենա Թուրքիայի ավելի մեծ ռազմաօդային ուժերի նկատմամբ։ Նշվում է, որ եթե Աթենքը ստանա F-35-ների իր էսկադրիլիան, իսկ Անկարան՝ իր նոր F-16-երն ու արդիականացման սարքավորումները, առաջինը դեռևս կունենա հստակ տեխնոլոգիական առավելություն: Եվ ոչ միայն այն պատճառով, որ այն միակը կլինի 5-րդ սերնդի ռեակտիվ ինքնաթիռներով:
Հունաստանն արդեն պայմանագիր է կնքել 84 միավոր HAF F-16-երի արդիականացման համար՝ Block 72 կոնֆիգուրացիայից: Lockheed Martin-ն այդ պայմանագիրը կավարտի 2027 թվականի կեսերին։ Ուստի, եթե նախագահ Բայդենի վարչակազմը շուտով կարողանա ստանալ Կոնգրեսի հավանությունը թուրքական F-16-երի գործարքի համար, ինչը հեռու է երաշխավորված լինելուց, Հունաստանն արդեն 84 արդիականացված F-16 ինքնաթիռներ կունենա:
Հունաստանը կսկսի նաև F-35-ների մատակարարումը մոտավորապես այն ժամանակ, երբ Lockheed Martin-ը կավարտի այդ HAF F-16-երի արդիականացումը։
Եվ, իհարկե, այս ամենին գումարվում են 24 Dassault Rafale F3R ինքնաթիռները, որոնք Հունաստանն արդեն սկսել է մատակարարել Ֆրանսիայից, դրանք ավելի առաջադեմ են, քան թուրքական զինանոցի ցանկացած ինքնաթիռ:
Նշվում է, որ ամեն դեպում Թուրքիայի համար դժվար կլինի հաղթահարել տեխնոլոգիական այն զգալի առավելությունը, որին Հունաստանը հավանաբար կհասնի մինչև 2030 թվականը։ Նույնիսկ եթե Թուրքիան ունենա 120 Block 70/72 F-16 (40 բոլորովին նոր և 80 արդիականացված), դրանք կհակադրվեն Հունաստանի 84 Block 72 Vipers-ներին (բոլորը շահագործման մեջ կլինեն ոչ ուշ, քան 2027 թվականի երկրորդ կեսը), 20-40 F-35-ին և առնվազն 24 Rafales-ին։ Այլ կերպ ասած՝ Հունաստանը կունենա ոչ պակաս, քան 128 կործանիչներ, որոնք հավասար են կամ գերազանցում են Թուրքիայի լավագույն ինքնաթիռներին:
Լրատվամիջոցը գրում է, որ եթե Թուրքիան, իր արդիականացված F-16-ներից բացի, գնի մեկ կամ երկու առաջադեմ Eurofighters էսկադրիլիա, Հունաստանի ռազմաօդային ուժերը, ամենայն հավանականությամբ, կպահպանեն այս տեխնոլոգիական առավելությունը:
Էմմա Չոբանյան
