09.10.2026 | 13:56
ԱԱԾ-ն հերքում է ադրբեջանցիների ներթափանցումը Սյունիք
Շվեդիայի վարչապետը չի պատասխանել՝ խոստացե՞լ է Էրդողանին քրդերի արտահանձնում, թե՝ ոչ
Քաղաքականություն
04.07.2022 | 21:28
Շվեդիայի վարչապետ Մագդալենա Անդերսոնը հրաժարվել է հերքել Թուրքիայի այն պնդումը, որ նա խոստացել է արտահանձնել Անկարայի կողմից փնտրվող անձանց՝ ՆԱՏՕ-ին միանալու Ստոկհոլմի ջանքերի շրջանակում, հաղորդում է Agence France-Presse-ը, որին վկայակոչում է Turkish Minute-ը։
Չնայած լրագրողների հարցերին ու Շվեդիայում քուրդ և թուրք փախստականների մտահոգություններին՝ Անդերսոնը չի ասել՝ արդյո՞ք նման պարտավորություն ստանձնել է՝ ՆԱՏՕ-ին Շվեդիայի անդամակցության դեմ Անկարայի առարկությունները վերացնելու համար։
«Ես ութ տարի եղել եմ նախարար և երբեք չեմ բարձրաձայնել, թե ինչ է խոսվել բանակցությունների սենյակում։ Դա ինձ հիմա դժվար իրավիճակի մեջ է դնում»,- ասել է նա։
Հավելենք, որ ՆԱՏՕ-ի գագաթնաժողովի մեկնարկին Թուրքիան, Շվեդիան և Ֆինլանդիան հուշագիր են ստորագրել։ Օրերս էլ Էրդողանը հայտարարել է, որ Շվեդիան արտահանձնել է «3-4 ահաբեկչի ու խոստացել արտահանձնել ևս 73-ին»։
Անդերսոնը, սակայն, նշել է, որ Շվեդիան շարունակելու է հարգել ազգային և միջազգային օրենքները, երկրի ոչ մի քաղաքացի չի արտահանձնվի, որոշումը կլինի անկախ իշխանությունների և դատարանների կողմից։
«Եթե դուք ներգրավված չեք ահաբեկչական գործունեության մեջ, անհանգստանալու կարիք չկա»,- ասել է նա։
Էմմա Չոբանյան
