26.11.2024 | 11:42
Հունաստանը պատրաստվում է իր ռուսական C-300 ՀՕՊ համակարգերն ու այլ զինատեսակները Հայաստանին փոխանցել․ Enikos
Անհայտ հրթիռը մխրճվել է Լուսնի մեջ․ CNN
Քաղաքականություն
29.06.2022 | 22:55
Անհայտ հրթիռը, որին Երկրի ուղեծրում NASA-ն հետևել է 2015 թվականից, մխրճվել է Լուսնի մեջ։ Երկրի արբանյակի վրա դրանից հետո կրկնակի խառնարան է առաջացել, ինչը գրանցել է NASA Lunar Reconnaissance-ը, հայտնում է CNN-ը։
Տիեզերական գործակալությունը պարզաբանել է, որ առաջին խառնարանն ունի 18 մետր չափսեր, երկրորդը՝ 16 մետր։
«Սա կարող է նշանակել, որ հրթիռը մեծ զանգված է ունեցել յուրաքանչյուր ծայրում։ Սովորաբար օգտագործված հրթիռի զանգվածը կենտրոնացված է շարժիչի վերջում, իսկ մնացած մասը բաղկացած է վառելիքի դատարկ բաքից»,- պարզաբանել են NASA-ում։
Նշվում է նաև, որ հրթիռի անկումը դեպի Լուսին անակնկալ է եղել մասնագետների համար։ NASA-ում խոստովանել են, որ չեն կարողացել բացահայտել Երկրի արբանյակի վրա ընկած հրթիռը։
Աղբյուրի տվյալներով՝ ուղեծրային դինամիկայի մեջ մասնագիտացած գիտնական Բիլ Գրեյն առաջինն է նկատել օբյեկտը և հաշվարկել դրա հետագիծը։ Նա կարծիք է հայտնել, որ դրանք SpaceX Falcon հրթիռի աստիճաներն են, որոնք մնացել են 2015 թվականի արձակումից: Սակայն Իլոն Մասկը հերքել է սա, իսկ ավելի ուշ հետազոտողն ընդունել է, որ սխալվել է։
Հաջորդ ենթադրությունը դարձել է այն, որ սա 2014 թվականի չինական լուսնային առաքելությունն է։ Սակայն Չինաստանի ԱԳ նախարարությունն իր հերթին հերքել է, որ այն իր «Չանյէ-5» առաքելության հրթիռի կրիչն է, և պնդել, որ իրենց հրթիռի մնացորդները վառվել են Երկրի մթնոլորտ մուտք գործելիս։
«NASA -ի փորձագետները չգիտեն, թե ում է պատկանում նման ծանր հրթիռը, որը մխրճվել է Լուսնի մեջ՝ թողնելով իր չափերով դրա վրա գտնվող խառնարանների հետ համեմատելի խառնարան»,- ասվում է հոդվածում։
Տաթև Ֆռանգյան
