13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Ապօրինի որոշումներ կայացրած դատավորների լիազորությունները կկասեցվե՞ն. 15 տարվա վաղեմության ՄԻԵԴ վճիռները կուսումնասիրվեն․ ՏԵՍԱՆՅՈՒԹ
Քաղաքականություն
29.06.2022 | 19:10
Մարդու իրավունքների եվրոպական դատարանի (ՄԻԵԴ) վճիռները դատավորի լիազորությունների կասեցման հիմք կհանդիսանան: Ազգային ժողովում առաջին ընթերցմամբ ընդունված «Դատական օրենսգիրք» սահմանադրական օրենքում փոփոխություններ և լրացումներ կատարելու մասին օրենքի նախագծով հնարավոր կլինի ուսումնասիրել 15 տարի վաղեմությամբ ՄԻԵԴ-ի՝ Հայաստանի դեմ կայացրած վճիռները: Խոսքն այն որոշումների մասին է, որոնցում արձանագրվել է դատավորի կողմից միտումնավոր կամ կոպիտ անփութությամբ խախտում: Իսկ այդ հիմքով կարգապահական վարույթ հնարավոր կլինի հարուցել այն հայտնաբերելուց հետո 1 տարվա ընթացքում:
ՀՀ արդարադատության նախարարի տեղակալ Գրիգոր Մինասյանի խոսքով՝ այն դատավորները, որոնց պատճառով տեղի է ունեցել մարդու իրավունքների խախտում, կարողացել են խուսափել կարգապահական վարույթի շրջանակում իրենց վերաբերելի գործերի քննությունից, իսկ ներկայացված նախագիծը հնարավորություն կտա պատասխանատվության ենթարկել մարդու իրավունքների խախտում իրականացրած դատավորներին:
Տարիներ շարունակ ՄԻԵԴ-ի վճիռներով ֆինանսական փոխահատուցում է տրամադրվել քաղաքացիներին։ Նրանց խախտված իրավունքների համար պետությունը բյուջեից մեծ գումարներ է ծախսել։ Առաջարկվող նախագծով, սակայն, ապօրինություն թույլ տված դատավորներից հօգուտ պետության գումար չի բռնագանձվի։ Գրիգոր Մինասյանի խոսքով՝ նման փոփոխություն այս նախագիծը չի ներառում։
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի հավաստմամբ՝ եթե Մարդու իրավունքների եվրոպական դատարանն իր որոշման մեջ արձանագրում է, որ օրենսդրական բացով չի պայմանավորված իրավունքի խախտումը, այլ դատավորի կանխակալ կամ գիտակցված գործողության պատճառով, ապա դա հիմք է դատավորի նկատմամբ դատավարական վարույթ կիրառելու համար:
Իրավապաշտպան Նինա Կարապետյանցի կարծիքով՝ օրենսդրական այս փոփոխությունը զսպիչ ուժ չի ունենա, և Մարդու իրավունքների եվրոպական դատարանից Հայաստանի դեմ վճիռներ հետագայում էլ կլինեն:
Նշենք, որ մինչև այժմ Մարդու իրավունքների եվրոպական դատարանը Հայաստանի դեմ կայացրել է շուրջ 170 վճիռ:
Մանրամասները՝ տեսանյութում։
Անի Թամրազյան
This publication was produced with the financial support of the European Union. Its contents are the sole responsibility of Factor TV and do not necessarily reflect the views of the European Union.
Այս հրապարակումը պատրաստվել է Եվրոպական միության ֆինանսական աջակցությամբ: Բովանդակության համար պատասխանատվություն է կրում Factor TV-ին, և պարտադիր չէ, որ այն արտահայտի Եվրոպական միության տեսակետները:
@Factor TV 2022. All rights reserved. Licensed to the European Union under conditions.
Պատրաստվել է «Եվրոպական մեդիահարթակ Հայաստանում. հուսալի և պրոֆեսիոնալ լրատվամիջոցների կառուցումը» ծրագրի շրջանակում:
